Чогашыл йычкешталтын
Тыгай азап лийын кайыме годым 0,5 стакан йоҥыштымо имбирь да 0,5 стакан содо дене ямдылыме шокшо ванныште 15 минут кийыман.
Корштышо верыш 1 изи совла йоҥыштымо имбирь, 1 изи совла куркума да шокшо вӱд дене ямдылыме леве пастым компресс семын пыштыман– тидым кечеш 2 гана ыштыман.
Камвочмо але пералтме деч вара пуалын
Тургыжландарыше верыш 2 ужаш куркума ден 1 ужаш шинчал вартышым шавалтыман, вара бинт дене пӱтырен кучыктыман.
Омо йомын
Кастене малаш вочмо деч ончыч 1 стакан шӧреш 0,5 изи совла йоҥыштымо мускат пӱкшым луген йӱман але 1 изи совла жаритлыме да йоҥыштымо куминым сайын шушо 1 бананын пушкыдыж дене варен кочман.
Коваште йӱлен
Тургыжландарыше верыш ик чывыштыш куркумам алой сокеш шулыктарен пыштыман.
Йӱлалтыме верыш тыгак пелтыме але кокос ӱйым йыгаш лиеш.
Грипп да кылмен черланыме годым
0,5 изи совла имбирь ден 1 изи совла йоҥыштымо корицым 0,5 л вӱдыштӧ 10 минут шолтыман. Ямде отварым кажне 3 шагат гыч 1 стакан дене йӱман. Мӱй дене эшеат пайдале лиеш.
Нерге тургыжландара
Йӱлышӧ куркуман шикшыжым ӱпшычман. Тиде йӧн неррожым писын эрыкташ полша.
Нерым сайынрак нӱшталаш манын, икнаре налме йоҥыштымо корице, шем пурыс, кардамон да кумин вартышым ӱпшычман – аптекыште налме чӱчалтыш деч ала-мыняр пачаш сайын полша.
Шӱм чӱчкыдын кыра да коршта
Икнаре налме анис да кориандр нӧшмым, кӱрен сакырым йоҥыштыман да кечеш 3 гана 1 чывыштыш дене нелман.
Але 5 г анис нӧшмым, 3 г кориандр нӧшмым да 11 изюмым йӱдлан 1 стакан леве вӱдеш лазыртыман. Эрдене вартышым шӱрыман да йӱман.
Фарингит ала ларингит авалтен
7 миндаль пӱкшым 7 шем пурыс нӧшмӧ дене пырля йоҥыштыман, изишак вӱд ден сакырым ешарыман. Вартышым кажне 3-4 шагат гыч 1/4 изи совла дене подылман.
Шоло «йолагайыш» каен
1 стакан леве шӧреш 1 изи совла пелтыме ӱйым луген йӱман – икмыняр минут гычак полша.
М.ИВАНОВА ямдылен
М.Иванован фотожо/ «Марий Эл» увер агентстве
ТЕМЛЫМЕ ЙӦН ДЕНЕ ПАЙДАЛАНЫМЕ ДЕЧ ОНЧЫЧ ВРАЧ ДЕНЕ КАҤАШЫЗА!
