ВАШКЫЛ

«Марий Эл» газет

 424006 г. Йошкар-Ола,
СССР Вооружённый Вийын
70-ше идалыкше урем, 20
 Электрон адрес:  gazeta.mariel@yandex.ru
Телефон: 49-55-11.

—————————————————————————————————————————————————

Абдулов Александр Саликович

  Директор

Башкир АССР,  Мишкино район, Верхнее Сухоязово ялыште шочын-кушкын.

  Кÿшыл шинчымашым Н.К.Крупская лÿмеш Марий кугыжаныш педагогике институтышто налын. Руш, марий йылме-влак да литератур туныктышо. Ученый званийже: историй науко кандидат.

«Марий Эл» газет редакцийыште 1999 ий гыч  пашам ышта.

Почет званий: «Заслуженный журналист Республики Марий Эл» (2000 ий),  «Заслуженный работник культуры Российской Федерации» (2011 ий).

 

 

        Электрон адрес:: abdulov@inbox.ru

_____________________________________________________________________________________

Исаков Юрий Валентинович

Коммерческий директор

1958 ий 20 апрельыште Морко район Кӱчыкэҥер ялыште шочын. Кӱчыкэҥер тӱҥалтыш, Вончӱмбал кандашияш, Октябрьский кыдалаш школлаште тунемын. Тӱҥалтыш школ гычак «Ямде лий» газет дене пеҥгыде кылым кучен шоген, вара «Марий коммуна» газетыштат серымыже савыкталтын. Утларакше почеламутым возен. Санденак МарГУ-н историй-филологий факультетышкыже марий филологлан тунемаш пурен.

Вуз деч вара 1980 ийыште «Марий коммуна» («Марий Эл») газетыш пашаш толын да тунамсек тыште ышта. Ончыч информаций отделыште корреспондентлан, вара секретариатыште ответственный секретарьын алмаштышыжлан, а 2000 ий гыч экономике да бизнес редакторлан ыштен, 2013 ий гыч коммерческий директор сомылым шукта да экономике ден бизнес темылан воза.

2006 ийыште «Экономике вияҥмым ончыктымо шотышто эн сай паша» номинацийыште Марий Эл правительствын премийже дене палемдалтын. Республик кӱкшытан журналист паша конкурслаште «Элыште ыштен лукмо сатум аралымылан» (2003 ийыште), «Республиканский газетыште эн сай паша» (2005, 2008 ийлаште), «Республиканский газетын эн сай журналистше» (2010, 2012, 2015 ийлаште) номинацийлаште икымше верым налын. Рӱдӧ да Юл кундем МРСК-н «Энергия созидания» регион кокласе конкурсыштыжо «Савыктыше СМИ-н эн сай журналистше» номинаций дене 2010 ийыште кокымшо, а 2012 ийыште икымше верыш лектын. Правовой тематике дене журналист паша регион кокласе конкурсышто 2012 ийыште кумшо верлан, а республик конкурсышто 2013 ийыште икымше верлан диплом дене палемдалтын. Энергийым перегыме темылан проект дене Россий кӱкшытан ENES конкурсын 2016 ийысе регионал йыжыҥыштыже икымше лийын. А 2017 ийыште ыштыме  проектше Россий кӱкшытан «МедиаТЭК-2017» конкурсын «ТЭК профессийым чапландарымаш» номинацийыштыже регионал йыжыҥыште икымше, федерал йыжыҥыште кокымшо верыш лектын. 2018 ден 2019 ийлаштат ты конкурсын регионал йыжыҥыштыже сеҥыше семын палемдалтын. Ялозанлык тематике дене увер-сотемдарыш проектла дене Россий кӱкшытан «Мыйын мландем – Россий» конкурсышто 2017 ден 2018 ийлаште РФ Ялозанлык министерствын тауштымашыжым налын.

Марий Эл Республикын Почётан грамотыжо (1998 ийыште), «Марий Эл Республикын сулло журналистше» почётан лӱм (2004 ийыште), Россий Федерацийын Связь да массовый коммуникаций министерствыжын Почётан грамотыжо (2016 ийыште), Россий Журналист ушемын грамотыжо (2020 ийыште), «Россий Федерацийын сулло журналистше» почётан лӱм (2021 ийыште) дене наградитлалтын.

Йочалан возымо почеламутшо-влак «Кугымӧр», кугураклан серыме почеламут ден поэмыже-влак «Волгенче парча» ден «Кандывуй каваште» сборниклаште савыкталтыныт.

«Марий Эл» газет мыланем – кокымшо суртем да ешем, а журналист паша – усталыкым таптыме верем да илышем», – ойла Юрий Исаков.

Электрон адрес: isakov_juri@mail.ru

_____________________________________________________________________________________

Пехметова Светлана Федоровна

 Тӱҥ редакторын алмаштышыже 

1975 ий 28 июньышто Йошкар-Олаште шочын. 1981-1985 ийлаште Шернур район Чисола ден Кукнур школлаште тунемын. Кыдалаш шинчымашым Медведево район Нурма школышто налын (1992). МарГУ-н историй да филологий факультетыштыже «Филолог.  Марий йылмым ден литературым, руш йылме ден литературым туныктышо. «Культуролог» специализаций» специальностьлан тунемын (1998), Юл кундем кугыжаныш технологический университетын «Экономика, право, организация в социальной работе» программе дене «Магистр в социальной работе» дипломым (отличнын) арален (2016). Агробизнес кадрым уэш ямдылыше марий институтышто «Калык да религий кокласе кыл шотышто специалист» дипломым налын (2019).

Редакцийыште 1999 ий гыч ышта. Экологий да пӱртӱс дене пайдаланыме, мер-политике, исполнительный кучем, финн-угор калык йодышла дене редактор, парламент корреспондент,  Марий Эл правительстве ден ЦИК-ыш аккредитоватлыме журналист лийын. 2015 ий октябрь гыч 2018 ий декабрь марте тӱҥ редакторын алмаштышыже-ответственный секретарь, 2019 ий январь гыч – тӱҥ редакторын алмаштышыже.

С.Пехметован темлымыж почеш газетыште «Кугезе йӱла», «Марий тӱня», «Майатул», «Тамга» лаштыкла лекташ тӱҥалыныт.

«Марий газет редакцийыште тыршыше журналист ончылно кугу йодмаш – возымына гоч йылмынам аралаш, арня еда марий яллашке лектын коштмына дене тӱвыранам, йӱланам, тачысе илышнам возен шогаш. Тыгай сомылым кажне кечын шуктен шогат шке профессийым йӧратыше да калыкшым аклыше журналистна, – ойла коллегыже-шамыч нерген Светлана Федоровна.

Олык Ипай лӱмеш самырык-влаклан кугыжаныш премийын да М.Кастрен культур обществын журналист премийжын лауреатше. Россий  журналист ушемын ден РФ Связь да массовый коммуникаций министерствын Чап грамотышт, Иван Петрович Петров (1893-1938).  Марий Эллан 100 ий темме вашеш «Калык верч тыршымаш» медаль дене суапландаралтын.

Марий Элын сулло журналистше.

«Марий илем, лӱметым чын возем» справочник проектын авторжо.

  Электрон адрес: pektan@mail.ru

____________________________________________________________________________________

Садовин Евгений Николаевич

Тӱҥ редакторын алмаштышыже-ответственный секретарь

1961 ий 1 майыште Марий АССР, Параньга район, Кугу Почиҥга ялыште шочын.

Кугу Пумарий кыдалаш школ деч вара ик ий «Елеевский совхозышто пашам ыштен. Вара кок ий Совет Армий радамыште службым эртен. 1981 ийыште Марий кугыжаныш университетын подготовительный отделенийышкыже тунемаш  пурен. 1987 ийыште руш йылме да литератур, марий йылме да литератур туныктышо Шернур районысо «Призыв» газет редкцийыште пашам ышташ тӱҥалын. Ик ий гыч «Ямде лий!» республиканский йоча газетыш куснен. Тушто 1995 ий марте пашам ыштен. А 1995 ий гыч 2017 ий марте «Марий Эл» газет редакцийыште ответственный секретарьын алмаштышыжлан тыршен. 2017-2018 ийлаште «Ончыко» журналыште ответственный секретарьлан пашам ыштен. 2019 ий гыч «Марий Эл» газетыште тӱҥ реадкторын алмаштышыже-ответственный секретарь.

Марий Эл Республикын сулло журналистше (2010 ий).

    Электрон адрес: sadovinen@yandex.ru

____________________________________________________________________________________

Чепакова Раиса Михайловна

Ответственный секретарьын алмаштышыже

«Сурт-пече» газетын шеф-редакторжо

Ончыч кандашияш Карай, а вара Отымбал кыдалаш школым тунем пытарыме деч вара МарГУ-н историй да филологий факультетыштыже тунемаш пурен. 1991 ийыште «Филолог. Марий йылме ден литературым, руш йылме ден литературым туныктышо специальностьлан кӱшыл шинчымашым налын.

Дипломым кидыш налмеке, редакцийыште 1991 ий, октябрь тылзе гыч пашам ышта. Ончыч культур, литератур да искусство отделыште корреспондентлан, вара корректорлан кусаралтын.

1994 ийыште газетым компьютер йӧн верстатлаш тӱҥалмеке, верстальщиклан тунемын да тылеч вара «Марий Эл», «Сурт-пече» газетым шуко ий верстатлен. Тыгодымак «Сурт-печыш» тӱрлӧ теме дене материал-шамычым возен. А 2004 ий гыч «Сурт-пече» газетым верстатлыме да газет лекме йодышлан вуйын шоген.

2018 ий ыште производство дене кылдалтше кӱлешлык дене отдел редакторлан шогалтыме. Кызыт – ответственный секретарьын алмаштышыжлан ышта да «Марий Эл», «Сурт-пече» газет-шамычын лекме йодышлан типографийыш колтымо марте вуйын шога.

Паша лектышыжлан Тӱвыра пашаеҥ-влак профсоюз рескомын Чап грамотыжо (1998), Марий Эл Правительствын, Кугыжаныш Погынын Чап Грамотышт, Марий Эл Президентын Тауштымашыже дене палемдалтын.

Чепакова Раиса Михайловна «Марий Эл» газет редакцийыште ынде  31-ше ий кӱрылтде пашам ышта да редакцийын коллектившым лишыл еҥ-влаклан шотла.

Электрон адрес:  otvetsekmariel2013@mail.ru

____________________________________________________________________________________

 Байкова Алевтина Леонидовна

Отдел редактор

Морко район Унчо кундемын Шлань ялешыже чатлама йӱштӧ кечын,  январьыште, шочын-кушкын. Шлань ялысе тӱҥалтыш, а вара Унчо кыдалаш школлам тунем лекмеке Марий кугыжаныш универститетын историй да филологий факультшын «Журналистика» отделенийыштыже кӱшыл шинчымашым налын. Вузым 2005 ийыште тунемын лектын.

«Марий Эл» газет редакцийыште 2005 ий 5 сентябрь гыч пашам ышта. Эн ончыч редакцийыш пурышо серыш-влак дене пашам ыштен, «Лудшо да газет. Газет да лудшо» лаштыкым луктын, а вара самырык-влакын йодышышт шотышто редактор лийын, «Тошкалтыш» лаштыкыш материал-влакым чумырен. 2012 ий гыч – культур да искусство йодыш дене редактор. «Искусство», «Тӱвыра алан», «Театр илыш», «Чарша шойыч» лаштык-влакым ямдыла.

Марий Элын калык писательже В.Абукаев-Эмгак лӱмеш поро кумылым ончыктышо»Ший памаш» конкурсышто «Виш чон» премий ден палемдалтын (2015 ий).

Россий Печать кече вашеш Марий Эл Правительстве журналистике аланыште тыршыше-влаклан эртаралтше конкурсышто «Культур илышым эн сайын ончыктымо паша» номинацийыште диплом дене палемдалтын (2017; 2020ий).

«Марий Эл» газет – марий калыкын ик эн йӧратыме газетше. Тудым кажне марий ешыште налшаш улыт. Газетым лукмаште ятырын тыршат, но эн кугу вийым, мутат уке, журналист-влак пыштат. Нунын тыршымышт дене газетна оҥай да ойыртемалтше материал, фотокартычке дене пойдаралтыт. 

Материалым возымо гыч тӱҥалын, лудшына-влак деке миен шумешке чонем вургыжеш. Пашамым аклен каласыме кажне мут але туныктен каласыме шомак эшеат тыршен пашам ышташ кумылаҥдат, таратат», – манеш А.Байкова.

Электрон адрес: alevtina-bajkova@mail.ru _____________________________________________________________________________________

Иванова Маргарита Петровна

Отдел редактор

Маргарита 1973 ий 24 декабрьыште Волжский районысо Руш Шайра ялыште шочын.
Руш Шайра кандашияш школ деч вара Сотнур кыдалаш школышто, а вара Марий кугыжаныш университетыште историй да филологий факультетын марий филологий пӧлкаштыже тунемын. Филолог, марий йылме ден литературым, руш йылме ден литературым туныктышо профессийым налын, «Журналистике» специализаций дене курсым эртен.
«Марий Эл» газет редакцийыш 1997 ийыште толын. Тӱҥалтыште марий калыкын илыш корныжо да краеведений йодыш дене редакторлан ыштен, вара редакцийын коллективше денак лукмо «Сурт-пече» газетын шеф-редакторжо лийын, пытартыш шым ий – тазалыкым аралыме да калык илышым саемдыме йодыш дене редактор.
Россий культур пашаеҥ-влак профсоюзын Марий республиканский организацийжын чапкагазше, Марий Эл Республик тӱвыра, савыктыш да калык паша шотышто министерствын чапкагазше, Марий Эл Республик президентын таумутшо, Марий Эл Республик правительствын чапкагазше дене палемдалтын.
«Марий Эл» газет, журналист паша мыланем – чырык курымаш илышем, тамыкем да узьмакем… Шӱм-чонемлан келшыше пашам ойырен налаш полшымыжлан Юмылан нимучашдымын тауштем», — манеш Маргарита.

Электрон адрес: margarita_ivanova_73@mail.ru

_____________________________________________________________________________________

Камалетдинова Любовь Алексеевна

Отдел редактор

Камалетдинова Любовь Алексеевна 1972 ий 2 мартыште Кужэҥер район Кожласола (Мари-Олма) ялыште шочын. Кугу Лаждӱр ялысе кандашияш школ деч вара Йӱледӱр кыдалаш школышто тунемын.

Тылеч вара Марий кугыжаныш универститетын историй да филологий факультетшын «Марий йылме да литератур, руш йылме да литератур» отделенийыштыже кӱшыл шинчымашым налын. Вузым 1995 ийыште тунем пытарен. «Марий Эл» газет редакцийыште 1995 ий 6 февраль гыч пашам ышта. Тӱҥалтыште экологий да пӱртӱс дене пайдаланыме шотышто редактор лийын, а вара тунам моткочак чапланыше «СТИП», «Тошкалтыш» мужыр лаштыклам, «Чарша шойыч» лаштыкым луктын. Кызыт – еш да икшыве-влакын йодышышт шотышто редактор. «Ӱдырамаш корно», «Ю тӱня» странице-влакым ямдыла, МВД, УФСИН, суд пристав-влак дене кылдалтше материал-влакым воза.

Любовь Камалетдинова паша корныжо тӱҥалмеке вес ийынжак да тылеч вара икмыняр гана почела журналист-влак коклаште «Лучшие публикации для детей и юношества» номинацийыште сеҥен. Марий Эл Республикын Печать да увер комитетшын Чап грамотшо, Марий Эл Республикын правительствыжын Чап грамотшо да икмыняр моло награде дене палемдалтын. Марий Эл Республикын сулло журналистше.

«СТИП» мужыр лаштыкыш пурышо материал-влакым чумырен, «Йӧратымаш муро» книгам луктын. Тыгак «Олма вӱдет – ший вӱдет» книган кум авторжо кокла гыч иктыже.

«Марий Эл» газет, журналист паша мыланем тиде – илышем! Вет мый Марий кугыжаныш университетын 5-ше курсыштыжо тунеммем годымак тиде газет редакцийыш пашам ышташ толынам да але мартеат, ынде 26 ий (!), тыштак тыршем. Вес вере эше кушто тыге уло чонем пыштен ыштем ыле – каласашат ӧрам, вет тиде мыйын – йӧратыме пашам веле огыл, эше чон кумыл сомылем, – ойла Любовь Камалетдинова.

Электрон адрес: mari-olma@mail.ru

_____________________________________________________________________________________

Кожевникова Галина Ивановна

Отдел редактор

Галина Ивановна Кожевникова 1979 ий 13 февральыште Советский район Кельмаксола ялыште шочын.

Кельмаксола кыдалаш школ деч вара Марий кугыжаныш университетын историй да филологий факультетыштыже  «Филолог. Марий йылмым ден литературым, руш йылме ден литературым туныктышо. «Журналистике» специализаций» специальностьлан тунемын. Дипломым кидыш налмеке, 2001 ий гыч «Марий Эл» газет редакцийыште пашам ышташ тӱҥалын да кызыт марте тырша, тӱрлӧ йодыш дене редактор лийын, тыгак «Лудшо да газет», «Ӱдырамаш корно» да моло лаштыклам вӱден, а кызыт образований йодыш дене редакторлан шотлалтеш.

Тиде жапыште республик кӱкшытан тыгай журналист конкурслаште сеҥышыш лектын: «Первые шаги» (2002 ий), «Лучшая публикация в республиканской печати» (2003 ий), «За доброту пера» (2004 ий), «За спасение человека» (2005 ий), «За журналистскую настойчивость, сопряжённую с неприятностями для себя» (Серия публикаций на остросюжетные темы) (2008 ий), «Лучший очерк об учителе» (2012 ий),  «За действенность пера» (2019 ий).

Паша лектышыжлан тыгай награде дене палемдалтын: Марий Эл Тӱвыра, савыктыш да калык паша министерствын Чап грамотыжо (2009 ий), Марий Образований да науко министерствын Тауштымашан серышыже (2010, 2012 ий), Марий Эл Республикым вуйлатышын Тауштымашыже (2012 ий), Марий Эл Кугыжаныш Погынын Чап грамотыжо (2014 ий).

«Журналист лияш шонен омыл, но пӱрымаш мыйым лач тиде корныш савырен – кугу тау тудлан!», – ойла Галина Кожевникова.

e-mail: galinka.kozhevnikova.79@mail.ru

_____________________________________________________________________________________

Мошкина Ольга Витальевна

Отдел редактор

Морко район Нуръял-Корамас ял гыч улеш. Арын кыдалаш школым тунем пытарен.

Кӱшыл шинчымашым Марий кугыжаныш университетын Калыкле тӱвыра да тӱвыра кокласе коммуникаций институтыштыжо поген. Бакалавриатыште Этнокультур рӱдер вуйлатыше специальностьым налын, магистратурышто Юл ден Кама эҥер коклаште илыше калык-влакын тӱвыраштым шымлен.

«Марий Эл» газет редакцийыште 2019 ий гыч пашам ышта. Самырык-влаклан пӧлеклалтше «Тошкалтыш» лаштыкым вӱда. «Майатул» лаштыкыште финн-угор калык-влакын илышыштым ончыкта. Йоча-влаклан – «Йоча тӱням» келыштара.

Марий Элын калык писательже Вячеслав Абукаев-Эмгак лӱмеш поро кумылым ончыктышо «Ший памаш» конкурсышто «Вияш чон» премий дене палемдалтын. (26.12.2020). 2021 ийыште лекше»Самырык ме улына» книгаш очеркше пурен.

Электрон адрес: mov.olga9@mail.ru

_____________________________________________________________________________________

Носова Светлана Николаевна

Отдел редактор

Светлана Николаевна Носова Пеледыш тылызын 1969 ий 21-ше кечынже Кужэҥер районысо Эҥербал ялеш шочын. Старсела кандашияш школ деч вара Коҥганур школышто тунемын. Йошкар-Оласе тӱвыра да сымыктыш колледж деч вара Марий кугыжаныш университетын  историй да филологий факультетшын руш да марий йылме да литератур пӧлкаштыже шинчымашыжым нӧлтен, специализацийже «журналистике» лийын.

Марий Эл» газет  редакцийыш университетыште тунеммыж годымак 1995 ийыште толын да таче марте тушто ышта. Газетыште «Лудшо да газет» пӧлка гыч редактор семын ышташ тӱҥалын. Кызыт тӱҥ шотышто мер илыш, калык йӱла, историй, религий, экологий йодыш дене воза

Паша лектышыжлан Тӱвыра пашаеҥ-влак профсоюз рескомын Чап грамотыжо, Марий Эл Президентын Тауштымашыже, «За активное участие Во Всероссийской переписи населения» оҥыш пижыктыме пале, Марий Эл Правительствын, Кугыжаныш Погынын Чап Грамотышт, Мер Каҥашын Таумутшо дене палемдалтын, Марий Элын сулло журналистше.

Сай журналист материалым возымыжлан ик гана веле огыл палемдалтын: Марий Эл Правительствын журналистике аланыште тыршыше-влаклан эртарыме конкурсыштыжо диплом (2011 ий); «Марий Эл туризмын лидерже» конкурсышто диплом (2019 ий);  ВЛКСМ-ын 100 ияш лӱмгечыжлан журналист конкурсышто — икмыше вер (2019 ий); «Марий Эл туризмын лидерже» конкурсышто диплом (2019 ий), Марий Эл Правительствын журналист-влаклан эртарыме конкурсышто диплом (2020 ий), Марий Элын 100 ияш лӱмгечыжлан пӧлеклалтше конкурсышто диплом дене.

«Чырык курымым «Марий Эл» газетыште ыштымеке, редакций мыланем кокымшо сурт, еш… Журналист паша – ик эн йӧратыме, кумылым лукшо, ала-мом уым кычалаш, шинчымашым нӧлташ таратыше, ончыко шукышӧ…», – манеш Светлана Носова.

Электрон адрес:  enerbal@mail.ru

_____________________________________________________________________________________

Семенова Лидия Васильевна 

Отдел редактор

Морко районысо Шеҥше селаште 1962 ий 27 ноябрьыште шочын. 1980-1985 ийлаште Марий кугыжаныш университетын марий йылме да литератур факультетыштыже тунемын. 1985 ийыште «Филолог. Руш йылме да литератур, марий йылме да литератур преподаватель» специальность дене пытарен.

Паша корныжо 1985 ий 1 августышто «Марий коммуна» газет редакцийын письма учётчицаж деч тӱҥалын. 1986 ий март гыч 1989 ий марте «Ямде лий» газетыште тыршен, пионер илыш отдел вуйлатыше лийын. Вара «Марий Эл учитель» журнал (1991-1992), «Кугарня» газет редакцийлаште (1992-1997, отдел редактор, обозреватель) ыштен. 1997 ий гыч 1999 ий марте – «Ямде лий» газетын тӱҥ редакторжо. 1999 ий май гыч 2021 ий март марте «Ямде лий» газет» кугыжаныш унитар казна предприятийын директор-тӱҥ редакторжо. Ик идалык (2002-2003) «Кугарня» газет редакцийым вуйлатен.

Чапкагаз да чаплӱм: Марий Эл Республикын президентшын таумутшо (2000), Марий Эл Респубдикын правительствыжын Почётан грамотшо (2005), РФ культур пашаеҥ-влакын профсоюзын Почётан грамотшо (2017), РФ связь да массовый коммуникаций министертсвын Почётан грамотшо (2017), Марий Эл Республикын тӱвыра, печать да калык паша шотышто министерствын Йыван Кырла 1909-2009 «Калык верч тыршымаш» медальже (2009), В.А.Абукаев-Эмгакым шарнымаш медаль (2013), «Марий Элыште суаплыклан» орденын медальже (2021), Марий Элын сулло журналистше (2007).

Кок книган – «Йӧрате мыйым! Йӧрате…» (2012) да «Сӱанлык тувыр» (2019) – авторжо. М.Кастрен ушемын (Финляндий) литератур премийын лауреатше (2013). Икмыняр книган составительже.

«Марийский мир – Марий сандалык», «Этноузоры Марий Эл» журналлаште савыкталтше статья-влакын авторжо.

Электрон адрес:  L.v.semenova62@mail.ru

_____________________________________________________________________________________

Смоленцев Вячеслав Александрович

Отдел редактор

1957 ий 6 мартыште Марий АССР, Кужэҥер район, Кораксола ялыште шочын. Йывансола кыдалаш школ деч вара Н.К.Крупская лӱмеш Марий кугыжаныш педагогике институтышто кӱшыл шинчымашым налын, руш, марий йылме-влак да литератур туныктышо.

Институтын 4-ше курсшым тунем пытарыме деч вара 1978 ийыште «Марий коммуна» газет редакцийыш практикыш толын да таче кече мартеат тиде изданийыште (ынде «Марий Эл» газет) тырша. А 1979 ий гыч шке илышыжым тӱрыснек «Марий коммуна» газет дене кылден. Ик ий культур йодыш дене корреспондент лийын, а вара, 1980 ий гыч таче кече мартеат ялозанлык, ял илыш теме дене материал-влакым воза. 2018-2019 ийлаште тӱҥ редакторын алмаштышыже лийын, шуко жап редколлегий член.
Журналист республикысе чыла гаяк яллаште, тӱшка озанлыклаште, фермер-влак дене лийын, нунын нерген радамлын возен да воза.

Тыршымыжым кӱкшын аклыме. Марий Элын сулло журналистше. Россий Федерацийын связь да массовый коммуникаций министрын тауштымашыже, Марий Эл Правительствын, Марий Эл Верховный Советын, Марий Эл Печать да увер комитетшын, Профсоюз-влак Марий областной Совет Президиумын, СССР Журналист-влак ушемын Чап грамотыж дене палемдалтын. А Ялозанлык да кочкыш сату министерстве Чап грамотыж дене икмыняр гана суапландарен. Тыгак «Россельхозбанкын» дипломжо дене палемдалтын. Россий Печать кече вашеш Марий Эл Правительствын журналистике аланыште тыршыше-влаклан эртаралтше конкурсышто «Ялозанлыкым эн сайын ончыктымо паша», тыгак республикысе Журналист ушемын эртарыме «Республиканский газет-влак коклаште тыршыше эн сай журналист» номинацийлаште ик гана веле огыл сеҥышыш лектын да диплом, премий дене палдемдалтын.
«Ял илыш», «Ялозанлык» теме деч посна мӱкшызӧ-влакын пашашт дене кылдалтше материал-влакым воза, вет тудо шкежат мӱкшызӧ, шочмо ялыштыже мӱкшотарже уло. Тылеч посна гармоньым шокташ йӧрата.

«Марий Эл» газет, тудын пашаче коллективше мыланем кокымшо ешем гаяк. Эр еда пашашке кумыл нӧлтшӧ толам. Ялыш лекме годым газет нерген поро шомакым колын, тыгак кумыл нӧлтеш, утларак тыршаш вий ешаралтеш. Кажне марий еш «Марий Элым» налшашак», — манеш журналист.

Электрон адрес:  smolentsevslavik@yandex.ru

_____________________________________________________________________________________

Шакиров Павел Шакирьянович

Кусарыше-редактор

1951 ий 19 июньышто  Башкир АССР  Калтаса районысо Тошто Калтаса ялыште шочын. Ондак шочмо ялысе кандашияш школышто, а вараже Калтаса селасе кыдалаш школышто тунемын.

Школым тунем лекмек, Калтаса селасе овощесушильный заводышто чоҥышо да олмыктышо цехыште плотниклан, пилорамыште  тыглай пашазылан ыштен, пел ий Калтаса межколхозстройышто  молотобоецлан тыршен, вараже уэш овощесушильный заводыш пєртылын.

1970-1972  ийлаште Совет Армий радамыште служитлен.

Армий гыч пєртылмек, уэш заводышто пашам ыштен, ты ийыштак Н.К.Крупская лўмеш  Марий кугыжаныш педагогический институтыш тунемаш пурен. 1976 ийыште вузым сайын тунемын пытарымек, «Марий коммуна» газет редакцийыште кусарышылан ышташ тӱҥалын. Пел ий гыч ответственный секретарьын алмаштышыжлан шогалтеныт.

1994 ий гыч 1999 ий йотке – «Марий Эл» газет редакцийын ответственный секретарьже. 1999 ий июнь гыч кызытсе жап марте туштак кусарыше-редакторлан пашам ышта.

Газет редакцийысе профсоюз комитетым ятыр ий вуйлатен. Тыршымыжым республик да Россий кӱкшытан профсоюз орган-влакын ятыр почетан грамотышт  дене палемденыт. Марий Элын Кугыжаныш Погынжо дене шуко ий пеҥгыде кылым кучен шоген, парламентын документше-влакым марий йылмыш кусарен.  Тидлан  Кугыжаныш Погын Шакировым  шуко гана Почетан грамотыж дене наградитлен, «За вклад в развитие  законодательства Марий Эл» отличий знакше дене палемден. Павел Шакирьянович тыгак 1993 ийыште Марий Эл Республикын Почётан грамотыж дене наградитлалтын. 2000 ийыште тудлан «Марий  Эл Республикын заслуженный журналистше»,  а 2016 ийыште  «Россий Федераций культурын заслуженный пашаеҥже» почётан лўмым пуымо.

Шакиров Павел Шакирьянович  «Марий Эл» газет редакцийыште ынде  46-шо ий кӱрылтде пашам ышта да редакцийым кокымшо суртшылан шотла.

Электрон адрес: pavel.shakirov.51@mail.ru

_____________________________________________________________________________________

Эшкинина Елена Егоровна

Спорт йодыш дене редактор

Тел.: 49-55-11

Электрон адрес: e_miro@mail.ru

_____________________________________________________________________________________

Скобелев Михаил Ильич

Фотокорреспондент

1961 ий 23 ноябрьыште Марий АССР, Советский район, Васлисола ялыште шочын. 1979 ийыште Кодам кыдалаш школ деч вара МарГУ-н физико-математический факультетышкыже тунемаш пурен. Тушто профессийым налмек, направлений почеш Йошкар-Оласе ЗПП заводыш, физико-химический лабораторийыш, инженер-физиклан пашашке каен. Тушто тыршымыж годым Российын шуко олалаштыже командировко дене лийын. Университетыште тунеммыж годым мер профессий факультетыште (ФОП) шинчымашым нӧлта, фотокружок вуйлатыше кокымшо профессийым налеш.

10 май 1998 ий майыште «Марий Эл» газет редакцийыш толын да е Михаил Ильич тидын деч вара ынде коло кум ий газетын кажне номержым фотосӱретше дене сӧрастара, сылнештара, лудшын кумылжым савыра. Скобелев тудо жапыште да кызытат «Феникс» фотоклуб дене кылым куча. Фотосӱретше гоч эн ончычак марий калыкын йӱлажым ончыкта. Тидыжым Марий Элын курымаш лӱмгечыжлан пӧлеклалтше фотовыставкыштат ужаш лиеш. Марий калыкнан тӱвыраже моткоч поян, тиде темымат чыла могырым почын ончыкта. 2010 ийыште Российысе фотохудожник-влак ушемын да Кугыжаныш калык творчестве пӧртын эртарыме «Территория Победы» Россий кӱкшытан фотовыставкыште «Паша кочай» фотосӱретшылан лауреат лӱмым пуат. Тиде выставкыш мемнан кундем гыч фотограф М.Скобелев Урал кундемыште, Свердлов область Кугу Тавра марий ялыште командировкышто лиймыж годым верысе фронтовикын фотосӱретшым пуа. А пытартыш кугу фотовыставкыже кодшо ийын ноябрьыште Ханты-Мансийск олаште лийын. Тыште «Кече почеш илена» фино-угор калык-влак тӱвырам ончыктышо тӱнямбал фестиваль эртен. Тыште тудо «Художественный фотографийыште пайрем ден йӱла-влак» номинацийыште «Кугече ташлама» фото-влак серийжылан II степенян лауреатын дипломжо дене палемдалтын.

Кугурак наградыже-влак кокла гыч Марий Эл Республикын правительствыжын, Кугыжаныш Погынын Чап грамотыштым, Кугыжаныш Думын депутатше Л.Яковлеван тауштымашыжым шотла. 2017 ийыште «Марий Эл Республикын социально-экономически вияҥмашыжым эн сайын ончыктымылан» конкурсын «Марий Эл Республикын тӱвыра илышыжым ончыктымаште эн сай паша» номинацийыштыже сеҥышыш лектын. Тыгак республикысе Журналист-влак ушемын 2003 ийысе журналист-влак паша конкурсын «Газет фотокорреспондентын эн сай пашаже» номинацийыште сеҥен. Республикысе  журналист-влак коклаште «СОVID – 19 нерген»  конкурсышто интернет-йӱклымаш почеш сеҥышыш лектын.

М.Скобелев «Марий Эл» газетыште арня еда лекше «Фотолаштык» страницыште калыкнан илышыжым, йӱлажым, пашажым, мотор пӱртӱсшым да художник-шамычын пашаштым ончыкта. «Сурт-пече» газетыште «Ыштыш-кучыш келшыше – шӱм-чон куана», «Кидмастар» лаштыкла-влакым ямдыла. Шкежак фото-влакым ышта, шкежак воза. Районлашке командировкыш мийымыж еда тыгай темыла дене материалым конда. Мыняр мотор, сӧрал да ойыртемалтше сурт-печым ончыктен, тӱрлӧ ӱзгарым шке кид дене ыштылше мастар-влак нерген каласкален –шотлен муашат ок лий.

Электрон адрес: mikale61@yandex.ru

_____________________________________________________________________________________

Васильева Елена Родионовна

Кадр шотышто инспектор

Морко район Йошкарэҥер ял гыч улеш.

Кокласола кыдалаш общеобразовательный школым (кызыт Кокласола лицей) тунем пытарен.

Кÿшыл шинчымашым Марий кугыжаныш университетын Калыкле тÿвыра да тÿвыра кокласе коммуникаций  институтыштыжо поген. Филолог (марий йылмым да литературым, руш йылмым да литературым туныктышо) специальностьым налын. Вузым 2013 ийыште тунем лектын .

«Марий Эл» газет редакцийыште 2020 ий гыч пашам ышта.

 

Электрон адрес:  gazeta.mariel@yandex.ru

_____________________________________________________________________________________

Хафизова Ираида Олеговна

Корректор

1970 ий 24 июньышто Морко район Изи Шӱргӧ ялыште шочын. Ярамарий кандашияш ден Кумыжъял кыдалаш школлам тунем пытарен. 1988 ийыште Н.К.Крупская лӱмеш Марий пединститутыш тунемаш пурен да 1993 ийыште марий йылме ден литератур, руш йылме ден литератур отделенийым пытарен. Институт деч вара кок ий шочмо Ярамарий школыштыжо марий йылме ден литературым туныктен.

«Марий Эл» газет редакцийыште 1997 ий гыч пашам ышта.

2013 ийыште Марий Эл Республикын правительствыжын Почётан грамотшо, тиде ийынак Россий Федерацийын Кыл да массовый коммуникаций шотышто министерствыжын Почётан грамотшо дене палемдалтын.

«Корректорлан ыштымем илышыште шке веремым мумемла чучеш. Ты редакцийыште пашам ыштыме 24 ий утла жапыште «Марий Эл» газетын коллектившым шке ешем дене таҥастарем. Пашам оҥай, чонлан келшыше, ответственный», – манеш Ираида Хафизова.

_____________________________________________________________________________________

Юдина Роза Владимировна

Корректор

Шернур район Шӱргыялыште шочын. Куженер район Токтайбеляк кыдалаш школым тунем пытарен. Кӱшыл шинчымашым 1994 ийыште Марий кугыжаныш университетын историй-филологий факультетшын марий отделенийыштыже налын.

«Марий Эл» газет редакцийыш 1999 ийыште корректор должностьыш толын.

2002 ийыште Марий Эл кугыжаныш печать да информаций комитетын почётан грамотшо да 2007 ийыште Тӱвыра, сымыктыш да калык паша шотышто министерствын Тауштымашан серышыж дене палемдалтын.

«Редакцийыште шуко ий пашам ыштыме ятыр оҥай еҥ дене палыме лияш йӧным пуэн, шуко йолташым муынам», – палемдыш Роза Юдина.

____________________________________________________________________________________

Чемекова Евгения Анатольевна

Дизайнер-верстальщик

1997 ий 17 январьыште Марий Турек район Сардаял ялыште шочын.

Сардаял индешияш ден Карлыган кыдалаш школлам тунем  пытарен. 2014-2018 Марий кугыжаныш университетыште Калыкле тӱвыра да тӱвыра кокласе коммуникаций институтышто марий йылме да литератур туныктышо направлений дене бакалавриатым тунем пытарен. 2018-2021 ийла тиде направлений денак магистратурышто шинчымашым поген.

«Марий Эл» газетыште 2018 ийыште пашаш пурен.

«Дизайнерын пашаже пеш оҥай, оригинальный, творческий шулышан», – манеш Евгения.

Электрон адрес:  otvetsekmariel2013@mail.ru

_____________________________________________________________________________________

Белоусов Александр Петрович

Дизайнер-верстальщик

1968 ий 17 ноябрьыште Марий АССР Медведево районысо Ноля-Вершина ялыште шочын. 1973 ийыште Йошкар-Олашке илаш куснен. 1976-1986 ийлаште Йошкар-Оласе 16-шо № кыдалаш школышто тунемын.

1986 ийыште МарГУ-н биолого-химический отделенийышкыже биологлан тунемаш пурен.

1988-1989 ийлаште Совет Армий радамыште Хабаровский кундемыште служитлен.

1999 ийыште, ешартыш образованийым налмеке, 20 ий утла полиграфийыште дизайнер-верстальщиклан  тырша.

«Марий книга савыктыш», ГУП «Типография Правительства Марий Эл», ГУП РМЭ «Газета «Марий Эл», ООО «ИПФ «СТРИНГ», МБУ «Редакция Медведевской районной газеты «ВЕСТИ», ООО «Газета «Марий Эл» – нине предприятийлаште тыршен.

Электрон адрес:  otvetsekmariel2013@mail.ru

_____________________________________________________________________________________

Казакова Эльвира Анатольевна

Дизайнер-верстальщик

1966 ий 4 мартыште Куженер район Кокшародо ялыште шочын. Куженер район Конганур кыдалаш школышто тунемын. 1984 ийыште 6 №-ан оласе профессионально-технический училищым тунем пытарымек, 1988 ий марте швея-мотористкылан Йошкар-Оласе «Труженица» фабрикыште пашам ыштен.

1989 гыч 2005 ий марте Марий телевиденийыште машинисткылан ыштен.

«Марий Эл» газет редакцийыште 2006 ий гыч оператор компьютерного набора-верстальщица пашам шукта.

2008 ийыште «Марий Эл» газетын эн сай наборщицыже Чап грамото дене палемдалтын. 2009 ийыште Профсоюзын Чап грамотыж дене, 2014 ийыште Госсобраний  Тауштымашан серышыж дене да 2015 ийыште Тӱвыра, сымыктыш да калык-влак паша шотышто министерствын Чап грамотыж дене палемдалтын.

«Редакцийыште пашам ыштыме жапыште республикнан шуко сылне верыштыже лийынам, ен-влак дене палыме лийынам, опытым погенам. Коклан шкежат онай материал-шамычым  кусаренам, ялысе калыкнан илышышт нерген возенам», – манеш Эльвира Казакова.

Электрон адрес:  otvetsekmariel2013@mail.ru

_____________________________________________________________________________________

Мочалова Ольга Михайловна

Тӱҥ бухгалтер

Свердловск область Сысертский район Арамиль олаште шочын. Мордовий Республикыште Ковылкино оласе 1-ше №-ан школым тунем пытарен. Саранскысе кооператив техникумышто шинчымашым поген. 1976 ийыште Марий Элыш толын. Ты жапыштак Москвасе потребительский коопераций университетыште заочно тунемын. 2000 ий 5 майыште Российысе профессионал бухгалтер ден аудитор-влакын институтышкышт пурен.

2018 ий 10 май гыч «Марий Эл» газет редакцийыште тӱҥ бухгалтерлан ышта. Пашан ветеранже.

«Газетыштына уло республикын илышыже ончыкталтеш. Ты савыктышым шуырак налышт манын шонем.  Тек тудо умбакыжат тӱвыргӧ, оҥай материаллан поян лиеш», – ойла Ольга Михайловна.

 

Электрон адрес:  gazeta.mariel@yandex.ru

_____________________________________________________________________________________

Иванова Лариса Васильевна

Бухгалтер

Йошкар-Олаште шочын. Физике-математике направлений почеш  14-ше №-ан школым тунем пытарен. Юл кундем кугыжаныш технологий университетыште менеджмент специальностьым налын.

1997 ий гыч «Марий Эл» газет редакцийыште тырша.

Тӱвыра, сымыктыш да калык-влак паша шотышто министерствын почётан да Россий Федерацийын Кыл да массовый коммуникаций шотышто министерствыжын почётан грамотлаж дене палемдалтын.

 

 Электрон адрес:  gazeta.mariel@yandex.ru

____________________________________________________________________________________

 

Подпискe да газетым шарыме пӧлка

Электрон адрес:  otvetsekmariel2013@mail.ru

_____________________________________________________________________________________