САМЫРЫК ТУКЫМ УВЕР ЙОГЫН

Чылажат тыйын кидыштет, самырык тукым!

– Ӱдыр-влак, кушко тыге каеда? – мотор марий тувырым чийыше ӱдыр-влакын школ коридор мучко ошкыл колтымыштым ончен кодын йодыч рвезе-влак.

– Марлан каена. Налыда мо? – лие вашмут.

Теве тиде рвезылык койыш! Теве тиде самырык пагыт – Марий самырык тукым слёт!

8 гыч 13 июль марте Марий Турек район Сардаял кандашияш школышто Марий самырык тукым слёт латнылымше гана эртаралтын. Тудын тӱҥ шонымашыже икымше слёт годсекак тыгай кодын: марий самырык еҥ-влакым мер пашашке ушаш, нунын коклаште лидер-ончылъеҥ-влакым ойыраш да вияҥашышт корным почаш. Тений слётыш Марий Эл, Пошкырт, Татарстан, Одо, Угарман да Виче кундемла гыч 60 утла ӱдыр-рвезе погынен, нунын кокла гыч икмыярже кок-кумшо гана толын гын, ятырышт марий шӱлышан кугу форумыш икымше гана логалыныт.

Кодшо шуматкечын, 9 июльышто, слётым торжественно почмо пайрем лийын. Погынышо-влакым Российысе марий-влакын федерал калыкле-тӱвыра автономийыштым вуйлатыше Л.Яковлева, Марий Оньыжа Э.Александров, Марий Эл туныктыш да шанче министр Л.Ревуцкая, Тӱвыра, печать да калык-влакын пашашт шотышто министрын алмаштышыже И.Садовин, Марий Турек муниципал район вуйлатыше Л.Яндыбаева, Марий Турек район администраций вуйлатыше С.Решетов шокшын саламленыт.

– Ӱдыр-рвезе-влак, тендам ужаш, вашлияш – кугу куан. Мемнан слётна нерген Россий кумдыкыштат палат. Тений кеҥежым Санкт-Петербургышто эртаралтше Финн-угор калык-влакын ассоциацийыштын (АФУН-ын) президиумжын заседанийыштыже слётнам пример семын палемден каласышт, моло финн-угор регионлаштат эртараш темлышт. Можыч, юбилей сынан 15-ше слётышко кумда Росийнан вес кундемыштыже погынена. Пиалан лийза, марий улмыдам нигунам да нигуштат ида мондо, – сугыньлен ойлен Марий самырык тукым слётлан тӱҥалтышым пыштыше Лариса Яковлева да слётым ончыкыжымат эртараш ФНК гоч грант окса дене полшаш шонымыжым луктын каласен.

Марий Элын тӱвыра, печать да калык-влакын пашашт шотышто министрын алмаштышыже Игорь Садовин мутым шуен:

– Министерстве велым слётым эртарымашке окса денат, ой-каҥаш денат шке надырнам пыштена, южгунам шылталенат налына. Тӱшка пашам тӱшкан ыштет гын веле, лектышыже лиеш. Теве тачысе гай марий вургемдам чийымыда, марла пелештымыда, марла кушталтен-муралтымыда дене марий тӱвыранам арален кодеда.

Сардаял Йошкар-Ола тораштырак – 170 меҥге коклаште – верланен. Оньыжа Эдуард Александровын мутшо почеш, слётым тыште эртараш шонымаш тӱрлӧ ийлаште тарванен, толын онченат каеныт, но… эре вученыт. Теве у мотор школым чоҥен шуктымек, Сардаял самырык тукымым ик арнялан шке помышешыже налын да шочшыжо семынак арален ашнен. «Те, ӱдыр-рвезе-влак, герой-влакын мландышкышт толында. Кугу Отечественный сарыште эрык илыш верч кредалше Совет Ушемын 11 геройжо мемнан район гыч лектын», – палемден Сергей Решетов. Геройлык шӱлышым слётын участникше-влак икымше кечынак, Марий Турек посёлко мучко экскурсий годым, В.П.Мосолов лӱмеш краеведений тоштерыште лиймышт годым шижыныт. Марий шанчызе, философ, культурологий доктор Галина Шкалинан «Марий калык – Онар калык» лекцийжат самырык тукымын шӱмешыже марий улмо дене кугешнымашым ылыжтыш манын ӱшаныме шуэш.

Л.СЕМЕНОВА

М.СКОБЕЛЕВЫН фотожо

Тичмаш материалым кугарнян, 15 июльышто, лекше номерыште лудса

Опубликовать в Одноклассники

Добавить комментарий