Ава – тўняште эн лишыл да шерге айдеме. Тудын пелен кечат чотрак ырыкта, йўштыжат шокшыракла чучеш, писе мардеж дечат авыралтмыла шкендым шижат. Ава пелен гына кажне икшыве шкенжым эн пиаланлан шотла. Аван ой-каҥашыже, тыланымашыже да сугынь мутшо кинде дечат шерге.
Йолташ-влак, авадан могай ой-каҥашыжым ала сугынь мутшым ўмыр мучкыда шуктен иледа? Могай пашалан аваланда кӧра тунемын шуктенда?
Анфиса ИВАНОВА, С.Г.Чавайн лўмеш национальный книгагудын библиотекарьже:
– Авам, Галина Николаевна Архипова, Морко район Шлань ялысе «Акреттўр» студийыште пашам ышта. Тудын дечак мыят марий тамгам тўрлаш тунемынам. Ава нерген Д.Орай пеш чаплын каласен: «Шочшым ыштен, тый тудлан илышым пуэт. Кече ырыктыме семынак, уло шўмет дене йӧратен, тый, ава, айдемым ончен куштат. Пелештыметше эн шыма, эн ласка. Пўсӧ тыйын шинчат ден пылышет. Шке шочшетым мланде вошт ужат, теҥыз гоч колат. Аяр деч кочо тыйын ойгет, кече деч весела тыйын куанымет, мамык деч пушкыдо тыйын шомакет. Тўняште первый айдеме тый улат, ава!» Авай, ме шинчашкет ончалын ойлена. Тылат уло шўм-чон дене тумо гай пеҥгыде тазалыкым, кайык гай куштылго капкылым, ласка илышым, порсын ярым гай кужу-кужу ўмырым тыланена. Тек вуй ўмбалнет куан шўдыр гына йўла. А шинчат гыч ойго шинчавўд огыл, а яндар памаш гай куан шинчавўд гына лектеш. Илышын неле-йӧсыжӧ тыйын поро чонетым торжаҥден кертын огыл. Тек кече гай волгыдо кумылет эре мемнам ырыкта. Пале авай: тый илет гын, ме пиалан улына.
Снежана БОГДАНОВА, амалкалче (Шернур район):
– Аваем, Римма Степановна Никитина, илышыштына эн кугу верым налеш. Тудо шкетынак мемнам, кум икшывым, ончен куштен. Ачам уке лийме годым мый 18 ияш, а шольым ден шўжарем 15 да 12 ияш лийынна. Авам тунемаш кўлмє нерген ойлен. Марий йўлам арален илаш да кучылташ туныктен. Шергакан авайна, тый мемнан эҥертышна, поро йолташна да эн йєратыме айдемына улат. Тау тылат, авай! Вуй ўмбалнет тыныс кава лийже, коштмо корныштет пиал озаланыже, осалым тошкалын эрте, сайже гына эре воктенет лийже. Пеҥ- гыде тазалыкым да порсын ярым гай кужу ўмырым тыланена.
Айгуль МУХАМАДЕЕВА, «Апгрейд» театр студийым вуйлатыше, актёр мастарлык дене туныктышо, режиссёр:
– Авам, Роза Порфирьевна Мухамадеева, поро чонан, ласка, шыма. Тудо изинек кугуракым колышташ, изиракым пагалаш туныктен. Кеч-кушто лийме годымат шкем аралаш, осал шонышо-влак деч шекланаш кўштен. Авам шуко пашалан туныктен, самырык годым ушкалымат лўштенам. Кызыт Озаҥ олаште илем да пашам ыштем гынат, шочмо Шлань ялышкем яра жапем лийме семын миен толаш да авамлан сурт сомылым ышташ полшем. Кеҥежым пакчаште шўкшудым пырля кўрына, чодырашке саскам погаш коштына, шудым вольыклан ямдылена, а эн чотшо тамле когыльым, мелнам кўэшташ келша. Шочмо суртышто лияшак тыршыман, тудо вий-куатым пуа. Авамат тидым пеш чўчкыдын ойла. Кугу олаште илымеке, тидым сайын умылем. Кеч-куштат шкемым сайын кучаш, шканет ўшаныше лияш кўлмӧ нерген авайын ойлымыжым шарнем. Авамлан тазалыкым, тыныслыкым да еш пиалым тыланена! Эре тыгаяк поро чонан лий, авай! Ме тыйым пеш чот йӧратена! Садлан тый декет да Альфия акай деке чўчкыдынрак толын кошташ тўҥалына.
Алевтина БАЙКОВА ямдылен
Фотом еш лаьбом гыч налме
