Республикыштына илыше граждан-влак поро кумылым ончыктымо «Чаманыде пуымо кушкыжмо» тӱнямбал акцийыш ушнен кертыт.
Тудо 3 декабрьыште эрта, но мероприятий 19 ноябрь — 4 декабрь жапым авалта.
Регионна тиде акцийыш нылымше гана ушна. Поро кумылым ончыктымо толкын Марий Элыште 2013 ийыште Доброволецын школжым почмо дене вийым налын. Тудо социальный, спортивный, событийный, инклюзивный, медицинский, экологический, Сеҥымаш да лӱдыкшыдымылык волонтёрствылан корным почын.
В.Путинын Доброволецын идалыкше семын увертарыме 2018 ий тӱҥ йыжыҥ лийын. Россий президентын добровольчествылан поснак кугу тӱткышым ойырымыжо шуко самырык еҥым волонтёр-влак радамыш ушнаш кумылаҥден. Таче Марий Элыштына тыгай 80 тӱжем утла участник шотлалтеш.
2019 ийыште Марий Элым вуйлатыше А.Евстифеев регионыштына добровольчествым вияҥдыме шотышто советым ыштыме нерген пунчалым луктын. Тудын цельже – добровольчествым умбакыжат вияҥдаш да чапландараш. Тылеч посна добровольчестве (волонтёрство) аланыште Марий Эл Республикым вуйлатышын грантшым учредитлыме.
Ушештарена, Чаманыде пуымо кушкыжмо – поро кумылым ончыктымо тӱнямбал кече. Тудын тӱҥ шонымашыже поро кумыл культурым вияҥдыме, поро пашашке лийме семын шукырак еҥым ушымо дене кылдалтын.
Тиде кечын участник-шамыч поро кумыл организаций-влаклан оксам погат, волонтёр акцийым, интернет сетьлаште флешмобым эртарат.
«Чаманыде пуымо кушкыжмо» тӱнямбал акцийыш 100 утла эл ушнен.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
