Марий парламентым вуйлатыше Михаил Васютин Курыкмарий районысо Усола ден Микрӓк кыдалаш школлаште лийын.
Сайлыме округышто лиймыж годым тудо тунемме верла пеленысе йоча лагерьыш коштшо йоча, тушто тыршыше туныктышо-влак дене вашлийын да каныме кумдыкышто санитарный нормым шуктымым да молымат терген.
Усола школышто 86 икшыве тунемеш, лагерьыште кум отряд уло. Курыкмарий районын депутат-влак погынымашын депутатше, верысе муниципальный образованийым вуйлатыше Евгений Смелов, тунемме верым вуйлатыше Римма Краснова дене пырля Михаил Васютин тунемме да модмо пӧлемлам ончен лектын.
Микрӓк школышто йоча-влакын канышышт нерген школ директор Людмила Ефимова каласкален. Тушто Марий Эл Кугыжаныш Погынын председательже лагерьыште йӱлаш пурышо «Келшымаш оҥго» мероприятийыш уло кумылын ушнен.
«Икшыве-влакын каныме жапышт пайдале, лӱдыкшыдымӧ лийшаш. Тидын дене кылдалтше йодыш республикысе кучем да депутат-влакын корпусышт кугу тӱткышым ойырат », – палемден Михаил Васютин.
Марий Эл Кугыжаныш Погынын пресс-службыжын уверже негызеш Галина Кожевникова ямдылен.
Марий Эл Кугыжаныш Погынын пресс-службыжын фотожо.
