30 июньышто Марий Эл Кугыжаныш Погынын 28-ше сесийыштыже депутат-влак социальный полыш мере-шамыч нерген законодательствыш пуртымо вашталтышым ик йӱк дене сайлан шотленыт. Регионын калык илышым вияҥдыме шотышто министрже Марина Островскаян палемдымыж почеш, тиде вашталтыш республикысе ава капиталым, 68377 теҥгем, тӱнен илыше ешлан кумшо да тылеч моло йочам ыштымыж (эргылыкеш але ӱдырлыкеш налмыж) деч вара ик ий гыч налаш правам пуа. Тымарте тыгай выплатым ешын нылымше йочам ыштымыже але ашнаш налмыж годым веле тӱленыт.
Тений 1 июнь марте регионысо ава капиталым 134 еш налын. Тидлан республикын бюджетше гыч 8,8 миллион теҥгем ойырымо.
Регионысо ава капитал – тиде «Демографий» национальный проектын направленийже-влак кокла гыч иктыже. Тудым ешысе ик еҥлан шотлымаште доходын Марий Элыште официально пеҥгыдемдыме эн изи окса кугыт, 12250 теҥге, деч шагал погынымыж годым пуат. Выплатым ача-ава кокла гыч иктыжлан тӱлат.
Марий Элын Калык илышым саемдыме шотышто министерствыже регионысо ава капиталым налаш правам пуышо йодмаш-влак дене эше ик гана палдара:
- Йодмашым пуышо еҥын да йочаже-влакын Россий гражданствышт лийшаш.
- Йодмашым пуышо еҥ ден тудын йочаже-влак пытартыш кум ийыште Марий Эл кумдыкышто регистрироватлыме лийшаш улыт.
- Кумшо да тылеч моло йочам ыштыме (ашнаш налме) кече деч вара ик ий эртышаш.
- Йодмашым пуышо еҥ але тудын пелашыже ик гана тӱлыман регионысо ава капиталым налаш лийме права дене тымарте пайдаланышаш огытыл.
Ава капитал йодмашым пуышо еҥлан ик гана веле ойыралтеш. А иканаште кок але тылеч шуко йочам ыштыме (ашнаш налме) годым улыжат ик выплате, 68377 теҥге, палемдалтеш.
М.ИВАНОВА
