Йылме шумлык
Кӱштымаш шукталтшаш
Ӱмаште Марий Эл вуйлатыше Ю.Зайцев Мер Каҥашын вуйверже дене вашлиймаш деч вара лукмо кӱштымашыж гыч латикымше пунктшо республикнан кугыжаныш йылмылаж дене кылдалтын.
Лачшымак корно указатель-влакым, транспортлаште, уремлаште, тӱрлӧ организаций-влакын вывескыштым республикнан кугыжаныш йылмылаж дене (рушла, олыкмарла да курыкмарла) чын возымо, ойлымо, кучылтмо шумлык мутланымаш, тергымаш ик гана веле огыл лийын. А йодыш лектынак лектеш. Эсогыл ӱмаште икмыняр кугорнышто указатель-влакым уэмден тӧрлымаштат йоҥылыш-влак улыт. Тыгайжым иктыш чумырен, угыч тӧрлаш манынак Марий Элыште флешмоб семын акций эртыш. Йӧра кеч Шернур район Кугу Торешкӱвар ялын лӱмжым ынде марла чын ешарен возеныт. Вет йоҥылыш коло ий утла шинчам «йыгыжтарен». Но… тыгодымак Лаж эҥерым марлаже Ляж (снимкыште) лиеш манын серен шынденыт.
Республикын транспорт да корно озанлык министрын алмаштышыже Е. Кузнецован палемдымыж почеш, 2022 ийыште Елеево (Кугу Пумарий) – Параньга, Звенигово – Памар, Звенигово – Шелангер – Морко, Йошкар-Ола – Санчурск, Йошкар-Ола – Уржум кугорнылаште кугыжаныш йылмыла дене возымо 273 указательым вераҥденыт. Тидлан 11,7млн. теҥге ойыралтын ыле. Тений ты паша умбакыже шуйна: Козьмодемьянск – Кугу Сундырь, Красный Мост – Килемар – Шараҥ (Нижегородский область), Куяр – Солнечный – Роҥго, Марьино – Юрино, Морко – Уньжинский, Нурсола – У Торъял, Оршанке – Пектубаево (Какшанмучаш) – У Торъял автомобиль корнылаште 245 указательым (марла, рушла возыманым) шогалташ палемдыме. Йоҥылыш ынже сеарлт манын, кызыт МарНИИЯЛИ гыч специалист-влак адак исполнитель-шамычлан тӧрлатен пуат. Нунышт марий шрифтым чын кучылтыт гын, чын возымо лиеш манын ӱшанена.
Нине корнылаже регион кӱкшытан опорный сетьлан шотлалтыт. А теве план почеш вес лу ий жапыште (2024-2034 ийлаште) муниципальный районла мучко эртыше регион кӱкшытан корнылаште указатель-шамыч рушлат-марлат лийын шуктышаш улыт. Тылеч посна тений эше марий сынан 10 деч шагал огыл автобус павильоным ышташ палемдыме. А чоҥышаш аэровокзалыште увертарымаш кугыжаныш йылмыла дене лиеш. Тыгак у авто-, кӱртьныгорно вокзаллаштат марла увертарымым тӧрлатат. А район кӧргыштӧ верысе кӱкшытан корныласе указательлан, вес семынже, ял кокласылан, район-влак шкешт мутым кучат.
Марий Элын промышленность, экономический вияҥмаш да торговльо министржын алмаштышыже И.Макаровын палемдымыж почеш, Предприниматель-влакын полыш фондышт дене пырля марий символикан, сынан сатум, вывескым ӱмаште 23 амалкалчылан ышташ полшеныт гын, тенийлан тыгай йодмаш 40 еҥ деч пурен.
Пытартыш ийлаште Йошкар-Олаштына национальный компонентым мыняр-гынат пуртат: Глезденев лӱмеш саклымвер, Ленин проспектыште марий орнаментан светильник-шамыч, пеледыш клумбо… Марий Элын Чоҥымо, архитектур да илыме-коммунал озанлык министерствын архитектур да градостроительстве пӧлка начальникше И.Козлов тыгай пашам умбакыжат шуйымо нерген ойлыш. А у зданий-влакым чоҥымо годым застройщик-влаклан проектым ямдылыме годымак марий компонентым шотыш налышт манын, администрацийлаштак шижтараш темлыш. Тидым кузерак ышташ лийме икмыняр темлымашым Йошкар-Ола администрацийын ола средан дизайнже да ландшафт архитектуржо отделын тӱҥ специалистше М.Анисимоват ыштыш.
Мер Каҥаш вуйлатыше Э.Александров совещанийыште каҥашыме йодышым мер актив шукертак тарватен, да ынде тиде да эше икмыняр йодыш Марий Эл вуйлатыше Ю.Зайцевын кӱштымашкыже пурталтмылан да шукталт толмылан тауштен каласен.
Ола ден районласе зданий фасад, урем-влак марий сынан, ик стилян лийышт манын, эше шуко тыршыман. Тӱвыра, савыктыш да калык-влакын пашашт шотышто министрын алмаштышыже, совещанийым вӱдышӧ И.Садовин кузерак сӧрастарыме шотышто темлымаш-влакым муниципальный образованийлаш колтена манын палемдыш. Регионым вуйлатышын кӱштымашыже кузерак шукталтмым контрольышто кучаш тӱҥалыт.
С.Пехметова
М.Бирюкован фотожо
