2023 ийысе кокымшо пелийлан «Марий Эл» ден «Сурт-пече» газет-влаклан подпискым ыштыше да лотерей модмашке ушнаш квитанцийыштым редакцийыш колтышо-влакын чотышт кажне пелийыште кокшӱдӧ-вӱчшӱдӧ утлашке погына. Звенигово район Кожвожмучаш ял гыч Наталия Архипова презым модын налын.
– Тӱҥ приз логалме нерген поро уверым эн ончычак ялысе почтальонна ужын да мемнан деке куржын толын. «Наталия Ивановна, презым модын налынат!» манын кычкырен. Чапле уверлан мый веле огыл, пошкудем-шамычат моткоч куаненыт, – каласкала Наталия Ивановна. – Кунам да кушеч тудым налын кондымо нерген Йошкар-Ола гыч Лилия шешкылан умылаш каласышым да палемдыме кечын пошкудем дене, автомашинаш шинчын, Марий Турек районыш кудална.
Мо оҥайже, Наталия Ивановналан «Марий Эл» ден «Сурт-пече» газет-влаклан подпискым Морко район Эҥерсола гыч тулачыже, Лидия Ивановна Семёнова, шочмо кечыжлан пӧлек шотеш ыштен пуэн. А такшым шочмо йылмына дене савыкталтше газет-влакым ончычат лудыныт, иктаж кок ий ончыч подпискым ыштымым чарненыт улмаш.
– Кок пачаш пӧлекым ыштымыжлан морко тулачемлан пеш кугу тау, – куанымыж дене Наталия Ивановнан йӱкшат чытырналтме гай лийын кайыш. – Марий Турекыш Медведево, Советский, Шернур районлам эртен кудалынна. Тусо ялозанлык деке миен шумеке йырваш ару, чылажат шот-рат дене улмо ӧрыктарен да сай вуйлатыше улмым тӱжвачынак шижтарен.
– Презым налын кондымеке, тудым ончаш эсогыл пошкудо-шамычат лӱмынак пуреныт. Лӱм шотышто кужун ышна шонкале: Пӧлекак манын лӱмдышна, – ойлыш пиалан ӱдырамаш. – Суртышто вольыкым эреак ончымо, кок ушкалым, ныл презым, ятыр вуй сӧснам ашныме, чыве-комбо нергенже ойлыманат огыл. А пытартыш жапыште кроликым да чывымак веле онченна. Эргым ден шешкымлан презым налаш шонымем нергенат ойленам ыле. Нуно мыйым чареныт. Очыни, вий-куат улмо годым ялысе ӱдырамаш вольыкым ончышашак, садлан шонымашем шукталтын! «Марий Эл» газет редакцийын пашаеҥже-шамычлан лудшышт-влаклан чапле пӧлекым ямдылымыштлан моткоч кугу тау. Поснак «Акпарс» агрофирмым вуйлатыше Гадил Саматович Ахатовланат чапле презым ончен-куштымыштлан тау. Пашашт эреак вораныже, а «Марий Эл» газетым лудшо ий гыч ийыш шукемже.
Н.Архиповам тӱҥ призым модын налмыж дене эше ик гана саламлена да ончыкшымат марий изданий-влак длене кылым кучаш тыланена.
Алевтина БАЙКОВА
Фотом еш альбом гыч налме
