Марий Эл вуйлатыше Юрий Зайцев Кужэҥер районыш миен коштмыж годым капитально олмыктымо да уэмдыме объектлаште лийын.
«Паша эркышнышаш огыл, тудым палемдыме жапыште шуктыман»
Эн ондак Одобеляк–Кужэҥер–Параньга корно реконструкций кузе кайымым терген. Ты корным олмыкташ Юрий Зайцев Кужэҥер муниципал районын активше дене вашлиймаш годым кӱштен. Кызыт корным пужен ыштат: плита-влакым кораҥденыт, тыгыде кӱм, асфальт да бетон шартышын йымал лончыжым оптымо, корно негызым кӱкшемдыме, пуч-влакым ачалыме паша мучашке лишемеш.
Паша «Лӱдыкшыдымӧ да сай качестван корно» нацпроект почеш шукталтеш.
Олмыктышаш корно кужыт 4 километр шуйна. Пашан акше – 511,2 миллион теҥге. Тачысе кечылан объект 78 процентлан ямде. Пашам 2024 ийыште мучашлаш палемдыме.
«Оралте койынак вашталтын, Йывансола тӱвыра пӧрт – ялысе калыкым шке йырже чумырышо вер»
2023 ийыште Йывансола ялысе тӱвыра пӧртын оралтыжым «Культура» нацпроект почеш уэмден ыштыме. Подрядчик-влак оралтын тӧр леведышыжым вӱчӧ (скатный) ледедыш дене вашталтеныт, окнам да омса янак-влакым весым шынденыт, оралтым калай касет дене комыжленыт, пӧлемла кӧргым олмыктеныт.
– Верысе ансамбль тӱнямбал да всероссийский аренылаште мастарлыкшым ончыкта, сеҥыше-влак радамыш логалеш. Тидыже куандара, – палемден Юрий Зайцев Йывансола тӱвыра пӧртыш мийымыж годым.
«Школлан 50 ий наре, ик ганат капитально олмыктымо огыл. Чылажымат пеш сайын ыштыме. Программе вес ийынат шуйна»
Кужэҥер тӱҥ школым образованийысе школ системым модернизироватлыме федеральный программе почеш капитально олмыктымо. Зданийыште отделке пашам шуктымо, шокшым пуышо, канализаций да электроснабжений системым, тыгак пожарный тошкалтышым ачалыме. Класслаште у мебельым шындылме, современный доскам сакыме, гардеробныйышто вешалке-влакым да вашталтен чийыме годым кучылталтше олымбалым вашталтыме.
Республик вуйлатыше спортзалым, ешартыш образованийын кумдыкшым, кочмыверым да класс-влакым ончен савырнен.
«Тений школлан 50 ий темеш, школым олмыктымаш тунемше да туныктышо-влаклан кугу пӧлек лийын», – Марий Эл вуйлатышылан тауштышыжла каласен школ директор Светлана Михайлова.
«Образованийысе школ системым модернизироватлыме программын кӱлешлыкшым эше ик гана шижына. Вашталтыш тӱжвач ончалмаштак коеш, у манме гаяк инфраструктур да уэмдыме коммуникаций. Туныктышо-влак уло кумылын пашам ыштат, йоча-влаклан – у парт, пӱкен-влак да кызытсе жаплан келшыше оборудований», – палемден Ю.Зайцев.
Ончен коштмо деч вара Марий Эл вуйлатыше совещанийым эртарен. Тушто районысо яллашке газым пуртымо, корным ыштыме да тӱвыра тӧнеж-влакым уэмдыме йодышым каҥашеныт.
Марий Эл Республикым вуйлатышын администрацийжын
информаций паша пӧлкажын уверже негызеш
Л.СЕМЕНОВА ямдылен
Д.РЕЧКИНЫН фотожо
