Пашадымылык шотышто пособийым закондымын налмылан могай наказаний лийын кертеш?
О.Николаева
Кужэҥер район.
Йодышлан вашмутым Медведево районысо прокурорын полышкалышыже С.Захарова вшештен:
– «РФ-ште «Калыклан паша верым ситарыме нерген» федерал закон дене келшышын, пашадыме еҥ-влаклан кугыжаныш пашадымылык шотышто пособийым гарантироватла, тидын шотыштак пашадыме еҥын жаплан пашам ыштен кертдыме пагытлан пособийым, занятость службо органын направленийже почеш тунемме пагытлан стипендийым тӱла, тыгак тӱлыман общественный пашаштат участватлаш йӧным пуа.
Шке правашт дене закондымын пайдаланыше-влак коклаште шойыштшо-шамычат лектыт. Граждан-влак пашашке пурымышт нерген огыт шижтаре, шояк документымат кондат, тидын годымак пашадымылык шотышто пособийым налыт. Пособийым налме факт пеҥгыдемдалтмеке, гражданин тудын кугытышым шке кумылын пӧртылтышаш. Уке гын, материал правам аралыше органыш колталтеш. Ты оксам суд гоч кӱрын луктыт.
А оксам пӧртылташ гражданин тореш лиеш гын, выплатым налме годым мошенничествылан мутым уголовно кучаш логалеш. Тиде РФ Уголовный кодексын 159-ше статьяштыже пеҥгыдемдалтын. Ты санкций почеш 120 тӱжем теҥге марте идалык марте судитлыме але 360 шагат марте обязательный пашаш колтымо еҥын пашадар але моло парыш кугыт штрафым пуэн кертыт. Але идалык марте исправительный пашаш колтат, але кок идалык марте эрыкым шыгыремдат, але кок ий марте пашам виеш ыштыктат, але ныл тылзе мартелан арестоватлат.
Умбакыже тунемаш ӱшан уло?
Эрык деч посна кодымо да кыдалаш шинчымашым налын шуктыдымо икшыве-влак исправительный учрежденийыште умбакыже тунемын кертыт мо?
Е.Порфирьев.
Медведево посёлко.
Йодышлан Марий Эл Республикын исправительный учрежденийлаштыже закон-влакым шуктымым тергыме шотышто Йошкар-Оласе прокурорын пашажым шуктышо Л.Букареева вашештен:
– РФ Уголовно-исполнительный кодексын 112-шо статьяж дене келшышын, исправительный учрежденийлаште шинчыше эрык деч посна кодымо 30 ияш марте судитлыме еҥ-влаклан общий образованийым налаш йӧн пуалтеш. Нуно профессиональный але квалицифированный паша дене кылдалтше кыдалаш-профессиональный образованийлан, а профессийдыме, судитлыме служащий-влак – ончыкыжым исправительный учрежденийыште пашам ыштен кертме профессийлан тунем кертыт.
Наказанийым эртыме пагытыште судитлыме еҥ кӱшыл школын базыштыжат тунем лектын кертеш. Исправительный учрежденийын адинистрацийыже тидлан йӧным ыштышаш.
Арака вуйым веле огыл корштара
Арака ден аҥыргыше еҥ преступленийым ышта гын, тиде титакшым эреак нелемда мо?
Е.Макаров
Йошкар-Ола.
Йодышлан Медведево районысо прокурорын полышкалышыже О.Лесовщикова вашештен:
– Чын, РФ Уголовный кодекс почеш арака, наркотик але моло аҥыртарыше вешества дене пайдаланымылан кӧра руштмаш наказанийым нелемдыше обстоятельствылан шотлалтеш. Тидын годым судья-влак чыла шотыш налыт: титикан еҥ шке койышыж дене обществылан лӱдыкшым ыштымым, обтоятельствым, йӱшӧ лийме койышыжлан могай негыз лиймым, тыгак шке личностьшын могай улмыжымат. Суд йӱшӧ лиймым преступленийым нелемдыме амаллан шотла гын, тудо приговорышто тыгай пунчалым лукмым негызлышаш. Йӱшӧ лийме преступленийым нелемда гын, Уголовный кодексын 56-шо статьяж дене келшышын, эсогыл кугу огыл нелытан преступленийым ыштышым эрык деч поснат коден кертыт.
С.Носова ямдылен.
