Мобилизаций

Кӱштымӧ шукталтеш

Эртыше арнян Марий Элын тазалык аралтыш министржын пашажым шуктышо Марина Панькова республикысе СМИ-влакын журналистыштлан брифингым эртарен.

– Регионым вуйлатыше Юрий Викторович Зайцев Тазалык аралтыш министерстве ончылан специальный военный операцийым эртарыме кумдыклашке наҥгайыме военнослужащий-шамычлан аптечке-влакым чумыраш задачым шынден. Таче кечылан чыла йодмаш дене келшыше 1840 аптечкым ямдыленна, – рашемден М.Панькова.

– Специальный военный операцийым эртарыме кумдыкла гыч пӧртылшӧ чыла еҥлан республикысе кажне медицине организацийыште полышым черет деч посна налаш йӧным ыштыме. Тидын нерген уверым медорганизаций-шамычын стендлашкышт да сайтлашкышт вераҥдыме. Медицине реабилитаций кӱлеш гын, тудым лӱмын келыштарыме медицине организацийлаште эрташ лиеш. «Тазалыкым шотыш кондаш келшыше медицине реабилитаций» у федеральный проектын кышкарыштыже  мемнан медорганизаций-влаклан пайдале реабилитацийым эртараш кызытсе оборудований-шамычым налме, – палдарыш министрын пашажым шуктышо.

Таче кечылан медицине реабилитацийым стационарыште эртараш лицензийым Звенигово ден Шернур районласе рӱдӧ больнице-влак, 1-ше №-ан медсанчасть да Йошкар-Оласе городской больнице налыныт. Лишыл жапыште Сар-влакын ветераныштын республиканский клинический госпитальыштат тыгай документан лиеш.  

Медорганизацийлаште стационар медицине реабилитаций деч посна амбулаторный реабилитацийымат эртарат. Пытартышыже шуко еҥлан йӧнанрак. Таче кечылан кум медицине организаций – Йошкар-Оласе 1-ше №-ан поликлинике, Звенигово районысо рӱдӧ больнице да 1-ше №-ан медсанчасть – тиде пашам уже шуктат. Амбулаторный  медицине реабилитацийым эртарыше медорганизаций-влакын радамыштым кугемдаш палемдыме.

М.ИВАНОВА

Опубликовать в Одноклассники

Добавить комментарий