Марий Эл вуйлатыше Юрий Зайцев 2025 ийыште шошо ага дене кылдалтше совещанийыште лийын. Тудым Россий правительстве председательын алмаштышыже Дмитрий Патрушев эртарен.
Тений республикын агропромышленный комплексшылан 238 миллион теҥгеаш полышым пуымо, 464,4 миллион теҥге льготан кредитым ойырымо.
«Ялозанлык пашаеҥ-влакын тыршымыштлан да кугыжаныш полышлан кӧра шошо агам сайын эртарен колташ ямде улына, тыгодым ӱдымӧ кумдыкым ешарена» – палемден Юрий Зайцев.
2025 ийыште икияш культур 174 гектарыш вераҥдалтшаш. Кодшо ийын кормалык кушкылым ӱдымым шотыш налаш гын, чумыр кумдык 314,4 тӱжем гектарыш погына. Тидыже кодшо ий дене таҥастарымаште 0,7 тӱжем гектарлан шукырак.
Ӱдышаш 25 тӱжем тонн урлыкашым ямдылыме. Тидыже кӱлеш нарак. 9,4 тӱжем тонн минеральный ӱяҥдышым кондымо.
Тений 550 миллион теҥгеаш 123 единице ялозанлык техникым да оборудованийым налме. Тыге трактор парк 1815 марте ешаралтын, мландым пушкыдемдыме 1602 машина да 555 сеялке улыт.
Марий Элыште шошо ага эр толмылан кӧра тургым ик тылзылан ондакрак тӱҥалын.
Вячеслав Смоленцевын фотожо
