Киевско-Житомирский ракетный дивизийын командованийжын да ветеран организацийжын тыршымышт дене Йошкар-Олаште верланыше военный госпитальыште Марий Элын сулло врачше, полковник Александр Балуев лӱмеш мемориал оҥам почмо.
Александр Иванович госпитальын тӱҥ врачшылан 21 ий ыштен, а военный службылан 51 ийым пӧлеклен. Мероприятийыш толшо-влакын ойлымышт почеш, А.Балуев военнослужащий-влакым эмлыме, самырыктукымым патриотизм шӱлышеш куштымо да ракет дивизийым пеҥгыдемдыме пашаш кугу надырым пыштен. Тудо поро шӱм-чонан, шке пашам профессионал семын шуктышо айдеме семын кумдан палыме.
М.ИВАНОВА.
