УВЕР ЙОГЫН

Шотыш налза: Льготылан йодмашым жапыштыже пуыза

Кугыжанышна гражданже-влаклан тӱрлӧ социальный полышым пуа. Ты радамышке яра рецепт дене ойырымо эмымат пуртыман. Но тиде полышым чын ойырен налаш кӱлешан. 

Тазалык утыжым огеш тургыжландаре, хронический чер-шамыч огыт пӱсем, огыт вияҥ гын, айдеме натуральный льготым окса пособий дене алмашташ кумылаҥеш. Тазалык лушкымек, чер нелеммек, тидлан кӧра кужун эмлалтмек, шуко тӱрлӧ эмым налмек веле окса компенсацийын ситыдымыже рашемеш…

Тымарте эм олмеш оксам налында, а ынде йоҥылыш лиймыдам умыленда гын, ушышкыда пыштыза: социальный услуго-влак наборым Пенсий фондыш келшыше йодмашым пуэн пӧртылтен кертыда.

Марий Эл Республикын Тазалыкым аралыме министерствыже тидым 1 октябрь деч ончыч ышташ темла, молан манаш гын тыге веле яра эмым 2019 ий гыч налаш йӧн лектеш. Тиде дате деч вара социальный услуго-влак наборым налме правам идалык мучко пӧртылташ огеш лий.

Шарныза: кумылда дене шкендан тазалыкда веле огыл, тыгак лишыл еҥда-влакын ласкалыкышт кылдалтын. Эмым але оксам ойырен налме деч ончыч эмлыше врачда дене каҥашыза.

2018 ийыште яра эмым налше граждан-влаклан Пенсий фондыш нимогай йодмашым пуаш огеш кӱл.

М.ИВАНОВА.

Опубликовать в Одноклассники

Добавить комментарий