Йошкар-Олаште ялозанлык ярмиҥга Ленин площадьыште эрташ тӱҥалеш.
Пытартыш ийлаште ялозанлык ярмиҥга Чарла кремльыште эртаралтын. Тушто икмыняр йӧндымылык нерген сатум ужалышыжат, налшыжат ик гана веле огыл ойленыт. Ик могырым тыште шыгыррак, автомашинам шогалташ вер уке. Адакшым калыклан сатум налаш толаш куштылгак огыл.
Йошкар-Ола администраций чыла тидым шотыш налын, ончыч ярмиҥгам эртарыме верыште, Ленин площадьыште, тудым уэш чӱчкыдынрак эртараш тӱҥалеш. Икымше тыгай ярмиҥга 31 августышто эртен, тудо шуко калыкым поген. Пакчасаскам, пареҥгым, чодыра емыжым, мӱйым, тыгак кидмастар-влакын сатуштым да молымат налаш лийын. Шашлыкым йӧратыше-влакымат куандареныт.
Талук мучаш марте ярмиҥгам эртарыме график дене палдарена. 21, 28 сентябрьыште, 5, 19, 29 октябрьыште, 9, 16, 23 ноябрьыште, 14 декабрьыште лиеш. Сатум налаш толза, огыда ӧкынӧ.
Вячеслав Смоленцев
Авторын фотожо
