Марий Элыште радиэлектронике сферылан кадрым ямдылыме пашаште у кӱкшытыш шумо.
Ушештарена, республикыштына верланыше Марий радиомеханический техникум «Профессионалитет» федеральный проектын грантыш сеҥен налын. Тудлан федеральный ден республикысе бюджетла гыч 24 миллион теҥге ойыралтын, 13 миллион теҥгем регионысо реальный экономикын секторжо гыч партнёр-влак пуэныт.
2024-2025 тунемме ий гыч техникумышто радиоэлектронике дене тунемме-производство кластер почылтын. Студент-влак шкан келшыше специальностьлан кызытсе жаплан келшыше оборудованиян лабораторийлаште тунемыт, тыгодым кугу тӱткыш паша верым пуышо партнёр-влакын организацийыштышт практикым эртымылан ойыралтеш.
Тыгай партнёр-шамыч радамыште республикнан ик эн ончыл предприятийже-влак улыт, тиде Марий машиностроительный завод, Полупроводик прибор-влак завод, «Потенциал» ООО да молат. 2024 ийыште нунын дене чумыр налмаште 20 ойпидышым ыштыме. Ойпидыш дене келшышын, техникумым тунем пытарыше студентлан партнёрлан шотлалтше предприятийыште паша вер ойыралтеш.
Марий Элым вуйлатыше Юрий Зайцев тиде кечылаште Марий радиомеханический техникумын «Радиоэлектронике-РМТ» кластерыштыже лийын. Тудо тунемме-производство кумдыкым ончен лектын, машиностроений ресурс рӱдерын лабораторийлаштыже лийын, тыгак кластерын индустриальный партнёржылан шотлалтше предприятий-влакын вуйлатышышт, тунемме верын преподавательже да студентше-шамыч, ача-ава-влак дене вашлийын.
Вашлиймаш годым ушештарен: кугыжанышнам вуйлатышын образований системе ончылно шындыме кӱлешан задачыже – элнан научно-технологический суверенитетшым вияҥдаш. Российын электрон компонентан базыже шкенжын лийшаш. Тыгак тудо ешарен: печатный платым да модульым ышташ республикын сеҥымашыже да йӧнжӧ улмо шотышто Россий правительстве председательын алмаштышыже Дмитрий Чернышенко палемден.
«Профессионалитет» федеральный проект тачысе кечылан моткоч кӱлешан, санденак мемнан элын президентше Владимир Владимирович Путин тудлан кугу тӱткышым ойыра. Мемнан задаче – тудым илышыш пурташ веле огыл, тыгак вияҥдаш, эсогыл трансформироватлаш, темлымаш-влакым пурташ. Мемнан ончылно тыгай задаче, кудыжым шуктымо годым мыланна вучаш жап уке. Мемнан оппонент-влак ик верыште огыт шого, ончыко каят, садлан нунын деч у технологийым налме ок сите – шкенаным ыштыман. Тачысе самырык тукым, искусственный интеллектым кучылтын, программирований дене кылдалтше ик эн у технологийым илышыш пурташ пеш писын тунемеш. Тиде моштымашым техникумышто тунемше-влак пеҥгыдемден толыт. Преподаватель, наставник, предприятийласе пашаеҥ-влакын тӱҥ задачышт – талантан йоча-шамычлан корным ончыкташ, полышым пуаш, кумылаҥдаш. Мыйын шонымаште, науко ден профессионал образований пырля эре йыгыре ошкылшаш улыт, тунам гына лектыш лиеш», – каласен Юрий Зайцев.
Вашлиймаш мучашлан тудо «Радиоэлектронике-РМТ» кластерын индустриальный партнёржылан шотлалтше предприятийлам вуйлатыше-влаклан Тауштымашан серышым кучыктен. Нунын лӱмышт: «Автограф» ООО-н директоржо Иван Иванов, «Инструмент-Н» ООО-н директоржо Николай Маргин, «Россий телевидений да радиовещаний сеть» ФГУП-ын «Марий Эл Республикын радиотелевизионный рӱдерже» филиалжын директоржо Андрей Шадрин.
Марий Эл Республикым вуйлатышын пресс-службыжын уверже негызеш Г.Кожевникова
