Йошкар-Олан рӱдӧ площадьыштыже верланыше «Советская» унагудо кодшо курымын 90-ше ийлаштыже петырналтын. Кок ий жапыште тудо 120 веран у чапле гостиницыш савырнышаш.
Унагудо Йошкар-Олан погыжлан шотлалтеш, но тудым «кучаш» окса шуко кӱлын, сандене умбакыже тудын дене пайдаланаш тӱрлӧ йӧным кычалыныт. 2023 ий марте зданийым тӱрлӧ «озалан» арендыш пуэдыме. Адакшым унагудо РФ-ын калык-влакын тӱвыра поянлыкыштын регион значениян объектшылан шотлалтеш, тудо кугыжаныш велым аралалтеш, оралтыжым айда-лийже кучылташ ок лий.
Кодшо ийын зданийын могай улмыжым тергымек, комиссий тудым аварийныйлан шотлен да уэмдаш кӱлмӧ нерген пунчалым луктын. Тений идалык мучко кычалмек, инвесторым мумо. Тиде отель-влак сеть, тушко Йошкар-Оласе унагудо-влак пурат. Инвестор моло помещений-влакын собственникышт дене пырля унагудым олмыкташ, у тӱсым пурташ тӱҥалеш. Эн тӱҥ йодмаш – тыште унагудак верланышаш.
Еҥ-влаклан лӱдыкшӧ ынже лий манын, кумдыкым авырен налыт. Инвесторын мутшо почеш, уэмдыме паша кок ий шуйнаш тӱҥалеш, тошто унагудо 4 «шӱдыран» гостиницыш савырна.
Лидия СЕМЕНОВА
Михаил СКОБЕЛЕВЫН фотожо
