АКЦИЙ КОНКУРСЫ

Автоледи-влак таҥасеныт

18 сентябрьыште Россий ДОСААФ-ын Йошкар-Оласе технике рӱдерыштыже «Автоледи Марий Эл-2020» таҥасымаш лийын.

Конкурс кум этап дене эртен. Тушко ушнышо ӱдыр ден ӱдырамаш-влак автодромышто кудалышт моштымо мастарлыкыштым, корно движений правилым да мемнан кундемын историйжым палымыштым ончыктеныт.

Икымше вер да «Автоледи Марий Эл-2020» титул дене Анна Шестакова палемдалтын. Кокымшо верым да икымше вице-мисс лӱмым коллегына, «Кугарня» газетын журналистше Надежда Моисеева сеҥен налын. Кумшо верыш Ульяна Ильина лектын. Йошкар-Олан администрацийже тыгак таҥасымашын эн самырык участницыже семын Наталья Журавлевалан посна призым кучыктен.

Ончычсо семынак конкурсыш вес кундемла гыч толшо-влакат ушненыт. Мутлан, Оксана Архипова шкеже Марий Эл гыч, а кызыт Москва областьыште ила. Тудо кугу габаритан «Hummer H2» машина дене скоростной маневрирований манмым туге ончыктен – ончаш толшо-влак чылан гаяк шке телефонышкышт эсогыл видео семын сниматленыт! Икманаш, ӱдыр ден ӱдырамаш-влакын таҥасымашышт гыч еҥ-влак моткочак нӧлтшӧ кумыл дене мӧҥгышкышт пӧртылыныт. «Машинам виктарыше ӱдырамаш – гранате дене маймыл» — тыгай ой уло. Тудым поснак пӧръеҥ-шамыч кучылташ моткоч йӧратат. Но нине участнице-шамыч раш ончыктеныт: тиде йӧршынат тыге огыл!

Л.КАМАЛЕТДИНОВА

Опубликовать в Одноклассники

Добавить комментарий