7 апрельыште Медведево районысо Краснооктябрьский школышто ты школын выпускникшым, специальный военный операцийыште задачым шуктымыж годым геройла вуйым пыштыше, Мужество орденын кавалерже Павел Чемодановым шарныме лӱмеш баскетбол дене турнир эртен.
Таҥасымашым почмаште Павелын ача-аваже (Андрей Аркадьевич ден Елена Ивановна), Медведево район администраций вуйлатышын социальный йодыш шотышто алмаштышыже Наталия Дербенёва, йолташыже-влак лийыныт.
Наталия Дербенёва тачысе кечын герой-шамычым шарнаш кӱлмӧ нерген ойлен.
Турнирын участник-влакым Краснооктябрьский посёлкышто илыше, Мужество орден дене палемдалтше, спецоперацийын ветеранже, «Герои Марий Эл. Талешке-влак» кадр программын участникше Павел Попов саламлен. Тудат элнам аралыше-влакын подвигыштым шарнаш, элналан ӱшанле лияш кӱлмӧ нерген ойлен.
Таҥасымаште 4 команде вийжым терген. Ончыко Руэм посёлкысо лицей-интернатын командыже лектын.
Палаш
П.Чемоданов Россий Федераций Вооружённый вийын Украиныште эртарыме спецоперацийыште икымше кече гычак участвоватлен. 3 майыште Харьков область Изюм районысо Весёлое села кундемыште бойышто шолдыргышо россий техникым олмыкташ наҥгайыме годым бандеровец-влак колонныштым миномёт гыч лÿйкаленыт. Землякна, йолташыже-влаклан илыше кодаш йöным ыштен, техникым лÿдыкшыдымö верыш луктын, но нелын сусырген…
Фотом Медведево район администрацийын соцкыл лаштыкше гыч налме.
