Йӧратен пӧлеклыме пеледыш вашке ок кошко, маныт калыкыште. Тиде чын очыни, но лач тидлан гына ӱшанен шот ок лек. Аршашын ӱмыржӧ кужу лийже манын, тудым кӱлеш семын ончен моштыман. А кузе тидым ыштыман, пеледышым налме годым мом шотыш налман да моло нерген самырык флорист Карина МИХАЙЛОВА дене мутым вашталтышна. Пайрем вашеш тидым тыландат, шергакан лудшына-влак, пален налаш оҥай лиеш, шонем.
Марий ӱдыр Татарстан Республик Агрыз район Пелемеш ялыште шочын. Казаньысе Юл кундем федерал университетын Елабугысо институтыштыжо тунем лектын, электроэнергетик специальностьым налын. Кызыт Уфа олаште ила.
– Карина, пеледыш дене пашам ышташ мо кумылаҥден?
– Агроном еш гыч улам. Пӱртӱсым йӧратымаш ава шӧр дене пурен, очыни (шыргыжеш-авт.).
Университетыште тунеммем годым сай стипендий лийын гынат, ешартыш оксам ыштен налме шуын. Тыге пеледышым ужалыме кевытыш логалынам.
– Аршашым ямдылыме годым, кӧлан тудо пӧлеклалтеш палыман…
– Тыге. Флорист налаш толшо еҥ деч тидым рашемдаш тыршышаш. Мутлан, тудым чолга ӱдырамашлан кучыкташ шона гын – чевер, тора гыч волгалтше тӱсаным темлем. У оза ныжылге, шыма – пеледышат келшыше чиян лийшаш. Пӧръеҥлан – кердым ушештарыше аршашым погем.
Айдемын шочмо тылзыжымат шотыш налаш лиеш. Телымсе-влаклан ошо, канде тӱс-влак келшен толыт. Тыгак еҥын койыш-шоктышыж нергенат мондыман огыл.
– Тале специалист лияш шагал огыл мастер-классыш ушненат, курслам эртенат. Шкеже иктаж туныктымо мероприятийым эртарет?
– Ты аланыште мастарлыкым погаш манын, тӱрлӧ йӧным кычалынам. Вет кажне аршашын – шке ойыртемже. Мутлан, сӱанлан пеледыш-влакым ик семын келыштарыман гын, вес пайремлан йӧршын вес семын кӱлеш.
Кок ий наре пеледыш мастаргудын ик озаже лийынам. Тунам коллегем дене пырля у ийлан пӧлеклалтше мастер-классым вӱденна. Кызыт ынде флорист лияш шонышо-влакым туныкташ ӱшанат. Мый нунын чыла чын да моторын ыштымыштым эскерем. Ой-каҥаш дене полшем.
– Карина, лишыл еҥ деч налме аршаш кужу жап куандарыже манын, мом ыштыман?
– Ме, ӱдыр-влак, пеледышым моткоч йӧратена. Тудым пӧлек шотеш налмеке, вигак вӱдыш шындена. Тиде, мутат уке, чын. Но тудын ӱмыржӧ кужурак лийже манын, икмыняр темлымашем уло:
- Аршашым атыш шындыме деч ончыч, вурдыжым важык пӱчса.
- Вазыште вӱдым кок кечылан ик гана вашталтыза.
- Телым суртышто юж кукшо. Садланак южым вӱдыжтарыше аппаратда уло гын, пеш сай. Уке гын, пеледыш ӱмбаке кажне кечын яндар вӱдым шыжыктыза.
Пӧлек шотеш «сухоцвет» манме пеш сай. Нуно кошкат гынат, шке моторлыкыштым огыт йомдаре. Пытартыш жапыште гипсофилам чӱчкыдын налыт.
Пӧлеклаш йӧрдымӧ пеледыш уке. Ик гана ик тӱрлым пӧлеклыза, вес гана – весым. Тыге налше еҥлан мо утларак келша – пален налаш лиеш.
– Яра жапым кузе эртарет?
– Кӱчым моторемдаш, чиялташ тунемынам. Психологий моткоч келша. Медициныштат шинчымашем нӧлтем. Тазалыклан пайдале кочкыш шотышто шымлымашым эртарем, шкаланем да лишылем-влаклан витаминлан поян сийым ямдылем. Тыгак сылнештарыме ӱзгарым ыштем.
– Лудшо-влаклан тыланымашет могай лиеш?
– Тунемза. У шинчымаш – ончыкылыкыш эн кӱлешан ошкыл. Таза лийза.
А флорист семын теве мом каласем: ты аланыште чонлан келшыше специалистым муза. Вет тудо – сай ӱп тӱредше дене иктак. Тендам кеч-кунамат умылаш, йодмыдам чын шукташ тӱҥалеш.
– Карина, пеледыш коклаште шкежат нунын гаяк пеледын, волгалтын шого.
– Тау!
О.МОШКИНА мутланен
