МАРИЙ ТӰНЯ

Марий вургем,  муро… сеҥашат полшат

Тиде сымыстарыше, чолга марий ӱдырамашым пытартыш ийлаште Марий калык погын деч посна Российысе регионла гыч марий-влакым чумырышо моло мероприятийылаштат икмыняр гана вашлийынам. Эре мотор марий вургемым чия. А тений шошым тудын Москошто, тӱнямбалнат ик эн мотор ӱдырамаш семын палемдалтымыжым пален налмеке, Мер Каҥашын шошымсо форумыштыжо вашлиймеке, тидын нерген мутланен налде ыжым чыте.

 Наталья Ябекова Свердловск область Красноуфимск район Юва селаште шочын-кушкын, бухгалтер-экономист специальность дене кӱшыл шинчымашым налын. Ынде ятыр ий ешыж дене Екатеринбург олаште ила да пашам ышта. Соцкыл гоч тудын шке кнудемыштыже тӱрлӧ мероприятийыште участвоватлымыж нерген пален налаш лиеш. Но тидыже тудын кумылжо дене веле огыл, тӱҥ паша деч посна  шуктымо ешартыш мер пашаж денат кылдалтын. Тудо Свердловск областьысе марий-влакын регионысо  калыкле тӱвыра автономийыштым, тыгак Екатеринбург оласе марий-влакын тыгаяк организацийыштым вуйлата. Тылеч посна Урал кундемысе финн-угор калык-влак ассоциацийын, «Единый Россий» партийын тусо организацийыжын правленийжын членже. Тыгодмак кум шочшан ава, сай пелаш да просто мотор ӱдырамаш. А шке моторлыкшым Наталья тӱнямбал кӱкшытыштат терга.

 – Наталья, ӱдырамашын саска лийын шумо пагытыште моторлык конкурсыш вигак Москош каяш  шонымашыже кузе лектын?

– Мемнан олаште ик палме ӱдыр моторлык сферыште пашам ышта. Тудо Москош Вячеслав Зайцевын эртарыме коллекцийжым ончкытымаште участвоватлаш вер уло мане. Мыйынат кумылем ылыже. Шке нерген возен колтышым. А мый изирак,  каҥга улам, сандене келшен толынам. Икмыняр жап гыч тушко ойырен налме нерген увертарышт. А мый куаненам веле. Тиде 2022 ий кеҥежым лийын. Эн ончыч В.Зайцевын коллекцийжым ончыктымаште лийынам. Мыйым шекланен шуктеныт да «Российын миссисше» моторлык конкурсыш ӱжыныт. А туштыжо «йошкар дорожко» манмет  монь,  мыйынат шкем тергымем, тушто лиймем шуын. Ты конкурсышто икымше  моторлык титулым налынам, «Российын эн моторжын вице-миссисше» лийынам. А шыжым угыч тыгаяк конкурсыш, но тӱнямбал кӱкшытаныш ӱжыныт, да туштат «вице-миссис» лӱмым суленам.

Тений шошым Вячеслав Зайцевын 85 ияш юбилейже эртен. Лӱмгечылан пӧлеклалтше пайремыш конкурслаште сеҥыше-влакым ӱжыныт. Мыят тушко логалынам. Лӱмлӧ дизайнерын колллекцийже гыч вургемым ончыкташ пиал шыргыжалын. Вара угыч у конкурсыш ойырен налыныт, уло Россий, союзный элла гыч участник-влак лийыныт. Туштыжо Гран-прим сеҥен налынам. Моткоч чаманем Вячеслав Зайцевын илыш гыч кайымыжлан, но тудын дене палыме лиймем дене моткоч кугешнем.

– И нине конкурслаште, поснак пытартышыштыже, марий вургемым ончыкташ йӧн лийын да тидыжат тыланда сеҥаш полшен, туге?

 — Туге. Тидыже поснак кумылым нӧлтен. А мыйын чиен лекташ вургемже ситыше. Урал велысе марий ӱдырамаш вургемымат эше ковам годсак ончыкташ йӧн лийын. Ик ӱдырамаш мылам Марий Элысе ӱдырамаш-влакын чийыме сынан вургемымат ыштен пуэн. Марий вургемым ончыктымо дене пырля эше конкурсышто марла муренам. Тушто вет шкем чыла велым ончыкташ кӱлын.  Шукыштым вургемемат, могай йылме дене мурымемат ӧрыктарен. Гран-прим сеҥен налаш чыла тидыжат полшен.

– 45 ияш марий ӱдырамашын сеҥымашыжлан куанаш гына кодеш. Модель семын параметрдам каласаш огыда вожыл?

– 62-90-90

– Шкем формышто кучаш мом ыштеда?

– Тыгакше мый шкемым спорт дене индырымаш уке. Шукертак жапын-жапын йога дене шкем шуарем, иктаж коло ий наре вегетариан кочкышым гына кочкам. Сад-пакчаштат паша ситалык.

– Шочшыдат улыт?

 – Кок ӱдырем, ик эргым 10, 8, 6 ияш улыт. Нунат тыгай конкурсышто участвоватлаш ямдылалтыт.

– А пелашда тореш огыл?

 – Дима дене коктын ме шке пашам ворандарена, фирмына уло.  Ешыштат, мер пашаштат,  чыла шотыштат тудо мыйын  тӱҥ эҥертышем. «Келша гын, ыште» манеш. А тыге ойлымыжо мыланем шулдырым вачыш пуа, кумылым нӧлта, шинчам йылгыжаш тарата. Мый моткоч тудлан тауштем.

– Фирмыште ыштыме, икшывым ончен-куштымо деч посна Те эше психологланат тунем лектында, стиль ден дизайн школым пытаренда. Кузе чыла шуктедаже? Мер илышыштат обязанностьда шуко…

– Чынжымак, мер илыш шуко жапым веле огыл, тӱрыс  жапым налеш. Но мый  еҥ-влакым моткоч йӧратем, нунылан полшашат моткоч келша, изинек тыгай улам. Авамат эре вурса: «Молылан эре полшет, а мӧҥгышто иктаж-мом ышташ жапет уке».  Но мый тыгаяк улам: чыланыштлан полшымак шуэш.

– Те вет шукерте огыл эше фольклор ансамбльым чумыренда?

– Тудо «Пиал» маналтеш. Тиде кӱчык жапыште сеҥымашнат уло. Ансамбльыш тыгак эше икшыве-шамычым ушенна. Кызыт нунымат  тӱшка калык ончыко лукташ ямдылена.

 ­ А кызыт Урал велысе марий-влакын ончыкылык паша планышт могай, вет лач Те ты пашам виктареда?

– Ме кызыт 10 июньышто Екатеринбургышто эртышашлык  Ага пайремлан ямдылалтына.

Светлана Носова мутланен.

Снимкыште: Н.Ябекова.

Фотом Н.Ябекован соцлаштыкше гыч налме

Опубликовать в Одноклассники

Добавить комментарий