Пошкырт кундемыште «Айык села – 2020» конкурсым эртарыме нерген возенна ыле. Тушто 28 ял кокла гыч ончыл верыш Мишкан районысо Кугу Соказа ялсоветыш пурышо Пӱнчер ял икымше верыш лектын. Тудак ты конкурсын республикысе этапыштыже районын чапшым аралаш тӱҥалеш. А тудыжо 1 мартыште мучашлалтеш. Кузе ты ял калык тидлан ямдылалтеш – таче кумданрак палдарена.
Мишкан районысо ял коклаште Пӱнчер — ик эн кугу. Тудо Уфа-Бирск-Янаул кугорно деч ик километр ӧрдыжтырак, Тӧргым эҥерын пурла велныже, вераҥын. Мишкан марте 28 километр лиеш гын, Бирск ола марте – 20, а рӱдола марте – 112. Ялыште 213 сурт уло. Тыгак тӱҥ общеобразовательный школ, йочасад, тӱвыра пӧрт, библиотек, фельдшер-акушер пункт, ныл кевыт. Тӱҥ шотышто марий-влак илат.
Тусо марий-влакын чолгалыкыштлан ӧраш да нуным мокталташ гына кодеш. Ялыштым тӱзатат, шке илышыштым поянракым, сайракым, веселаракым ышташ тыршат, спорт дене кылым кучат, фольклор коллективыштат, лӱмлӧ мурызыштат улыт.
Кодшо ийын тушто верысе инициативе программе полшымо дене шке вий спорт да каныш паркым ыштыме нерген возенна ыле. Тушто ынде ял калыклан спорт дене кылым кучаш, тазалыкым пеҥгыдемдаш, канаш йӧн ситышын. А тений телым гын, верысе пӱям эрыктен, коньки дене мунчалташ йӧнымат ыштеныт. Шукерте огыл ече дене куржталтмаш, скандинав коштмаш дене таҥасымаш-влакым эртареныт. Шахмат-шашке турнират эртат.
Каласен кодыман, тиде идалык Пошкырт кундемыште «Тазалык да чолган кужу илымаш» идалык семын увертаралтын. Скандинав коштмаш мероприятийшкыже Пӱнчер ял калык чолган ушнен, саде идалыкым тушто лач тыге почыныт.
Самырык тукымымат тыште айык илыш йӱлалан кумылаҥдат. Умылтарымаш паша дене пырля тӱрлӧ вашлиймашым, моло мероприятийым эртарат. Ӱдыр-рвезе-влакым кӱлеш семын туныктен, шуарен толмо, шочмо верым, калыкым йӧраташ кумылаҥдыше паша тушто сайын кая. Верысе администраций, ветеран-влак совет, школ ты шотышто чот тыршат. Тунемше-влак кокла гыч волонтёр группымат ыштеныт. Нуно тӱрлӧ пашам шуктат, тыгак ветеран-влаклан полшат.
Верысе тӱвыра пӧртын пашаеҥже-шамычын чолгалыкыштымат палемдыман, тӱрлӧ датылан гына огыл пӧлеклалтше мероприятийым эртарат. Икмыняр творческий коллектив пашам ышта. Мутлан, самырык-влакын куштышо посна коллективышт уло. Тудым «Мишкан – финн-угор тӱнян рӱдыверже» идалыкым иктешлыше районысо мероприятийышкат ӱжыныт. Верысе «Вӱд толкын» фольклор ансамблят чаплана. Участникше-влак репетиций деч посна эше, тошто марий йӱлам шарналтен, шинчымаш каслашке погынат. Тӱрлӧ кидпашам пырля ыштат, мурат, куштат… Пеленышт уныка-шамычымат кондештарат. Тыге огыл мо самырык тукым марий йӱлалан шӱмаҥеш да тудым шуяш тӱҥалеш.
С.Носова
Снимкылаште: Пӱнчер ялыште илыш шолеш.
Фотом интернетысе почмо соцкылысе лаштык гыч налме.
