Марий талешке кечылан Йошкар-Олаште икмыняр мероприятий палемдалтын. Тидын нерген уверым Мер Каҥаш воткыл лаштыкыштыже вераҥден.
22 апрельыште 11 шагатлан «Отечествын геройжо-влак» ончер-патриот рӱдерыште республикысе Марий тӱвыра рӱдер тунемше-влаклан «Ший талешке» шымлымаш паша конференцийым эртара.
24 апрельыште 13 шагатлан Мер Каҥаш кумылан-влакым Марий паркыште субботникыш ушнаш ӱжеш.
25 апрельыште 10 шагатлан Йылмым, сылнымутым да историйым шымлыше В.М.Васильев лӱмеш марий институтышто «III Ӱпымарий лудмаш: кызытсе компаравистикын пӱсӧ йодышыжо-влак» всероссийский шанче-практик конференций лиеш.
26 апрельыште 7 шагатлан С.Г.Чавайнлан памятник воктене марий меръеҥ-влак «Талешке сорта» акцийым эртарат. Варажым марий тӱвыра, науко, образований да моло сферыште чапым налше лӱмлӧ еҥ-влакын шарныктышышт воктеке пеледышым пыштат.
9 шагатлан Марий паркыште пушеҥгым шындаш тӱҥалыт. Кумылан-влак ушнен кертыт.
16 шагатлан М.Шкетан лӱмеш марий национальный драме театрыште поэт Валентин Колумбын шочмыжлан 90 ий теммылан пӧлеклалтше «Эре чоҥешташ, чоҥешташ» концерт лиеш.
18 шагатлан С.Г.Чавайн лӱмеш национальный книгагудышто «Библиойӱд» сотемдарыме акций стартым налеш. Тудын темыже «Шкенан геройна-влак» маналтеш. Тушко толшо-влакым лекций, экскурсий, поэзийым лудмаш, кино, усталык мастер-класс, тематический фотозоно-влак вучат.
Светлана Носова ямдылен
