Сургут олаште илыше марий ӱдыр Раисия Сунгурова шукерте огыл НКО-н ӱдырамашыже-влак» икымше всероссийский национальный премийын финалышкыже лектын да «Патриотизм ден исторический шарнымашым арален кодымаш» номинацийыште ойыртемалтын.
Конкурс дистанционно эртен. «Ончыч полуфиналыш, вара эше финалыш лекмым мый эн ончыч шкемым сеҥымашлан шотлем. Шке лӱдмашым, кокытеланымашым сеҥыше еҥ гына молымат поро пашалан ылыжтен да кумылаҥден, вӱден наҥгаен кертеш», – серен тудо соцлаштыкыштыже.
Раисия 2001 ий гыч ХМАО-Юграште «Марий ушем» регионысо мер организацийым вуйлата. Регионысо статусшым тудо 2019 ийыште налын. Организаций сай лектышым пуышо икмыняр проектым илышыш шыҥдарен. Таклан огыл Юграште тӱрлӧ калык кокласе кылым пеҥгыдемден толмылан губернатор премийымат ойырен. Р.Сунгурова палемда: «Кеч-могай конкурсышто (грант, творческий але вес тӱрлӧ…) сеҥымаш тиде финиш огыл, а граждан обществым вияҥдаш полшышо, поро, ответственный старт». А тыгайрак «личный» сеҥымашыже Раисиян шагал огыл. Тудо тыгак Россий писатель ушемын еҥже. Верысе тӱвыра рӱдерын тӱвыра сферыште менеджержылан ышта. Мер пашаште чолгалыкше поснак шинчаш перныше.
Сай пелаш, кум шочшан ава. Мо оҥайже: икшывыже-влакын лӱмыштат ойыртемалтше: Марис, Илавий да Аксар.
Югра кундемыште 13 ий илыме жапыште тудо тусо марий-влакым ушен, коклаштышт кылым пенгыдемден, у сеҥымашке шуаш кумылаҥден кертын. «Мый шке пашам моткоч йӧратем», – сера тудо шке лаштыкыштыже.
С.Носова
Снимкыште: Р.Сунгурова
