МАРИЙ ТӰНЯ

У еҥ толын, но палыме…

Пошкырт Республикысе «Эрвел Марий» калыкле-тӱвыра автономийым у еҥлан вуйлаташ ӱшаненыт.

Уфа олан кугыжаныш концерт залыштыже «Эрвел Марий» регионысо калыкле-тӱвыра автономийын конференцийже эртен. Тушко районла ден олала гыч 47 делегат толын. Пошкырт кундемыште 1989 ий 8 июль гыч мер ушем «Марий Ушем» лӱм дене пашам ыштен, а 2004 ийыште калыкле-тӱвыра автономийыш савырнен. 1995 ий гыч тудым Павел Бикмурзин (1951-2020) вуйлатен.

Конференций ондаксе вуйлатышым шарныме тат гыч тӱҥалын. Вара мер ушемын кум ияш пашажым иктешленыт, у вуйлатышым сайленыт, Уставшым пеҥгыдемденыт. Тысе марий диаспор — Российыште эн кугу. 2010 ийыште эртыше перепись почеш республикыште 103658 марий ила. Мишкан, Калтаса, Бирск, Шаран, Балтач да Нуриман районлаште нуно шукын улыт.

«Эрвел Марий» мер ушемын кум ияш пашаж дене вуйлатышын алмаштышыже Раиса Сатаева палдарен. Тудо Пошкырт кундемыште эртаралтше мероприятий-влак нерген да проект паша почеш шийвундым сеҥен налме нерген ойлен.

У вуйлатышылан Калтаса районысо Калмиямучаш ялыште шочын-кушшо, XI Марий калык погынын делегатше, Мер Каҥашын еҥже Виталий Ялаевым сайленыт. Тудо Пошкырт кундемысе кугыжаныш университетым тунем пытарен, марий мер толкынышто 2006 ий гыч тырша, кызыт ВТБ банкын пӧлкажым вуйлата. Организацийын у советышкыже индеш еҥым пуртеныт, вуйлатышыжлан Александр Гайсиным ойыреныт. Тудо шкеже Янаул районысо калыкле-тӱвыра автономий правленийын вуйлатышыже. Тыгак мер ушемыш пураш Янаул, Мишкан, Балтач, Бирск, Краснокам, Калтаса, Дӧртыльӧ, Шаран районласе да Уфа оласе верысе автономий-влак кумылан лийыныт.

Тыгак погынышо-влак Пошкырт кундемысе калык-влакын ассамблейышкышт марий калык деч еҥым сайленыт. Ик ой дене тыгай ӱшаным Мишкан районысо калыкле-тӱвыра автономийын председательже Валерий Байбулатовлан ыштеныт. Пошкырт республикысе «Эрвел Марий» калыкле-тӱвыра автономий Российысе марий-влакын калыкле-тӱвыра федерал автономийышкышт пураш кумылым ончыктен.

С.НОСОВА

Опубликовать в Одноклассники

Добавить комментарий