Урал федерал округышто Россий Федераций президентын полномочный представительже, «Единая Росссия» партийын генеральный советшын секретарьжын полномочийжым шуктышо Владимир Якушев Йошкар-Оласе 32-шо №-ан у школышто лийын. Марий Элым вуйлатыше Юрий Зайцев дене пырля тудо образовательный организацийын у тунемме ийлан ямде улмыжым аклен.
Тиде школышто 1120 йоча тунемаш тӱҥалеш, нунылан чылаже 37 класс ямде. Шинчымашым налаш да моштымашым вияҥдаш тыгак увер-книгагудо рӱдерыште, актовый ден спортзалыште, ритмике классыште, стадионышто да моло кумдыкышто жаплан келшыше оборудованийым вераҥдыме. Мероприятий-влак школ кӧргыштӧ веле огыл, тӱжвалне чоҥымо амфитеатрыште эртаралташ тӱҥалыт.
Владимир Якушев палемден: Россий Федераций президентын кӱштымашыже почеш образовательный тӧнеж-влакым чоҥымо да нуным капитально олмыктымо паша дене кылдалтше программе-шамыч – «Единая Россия» партийын тӱҥ направленийже. Россий Просвещений министерстве дене пырля нуно чылажымат контрольышто кучат. Кажне объектлан партийын депутатше вуйын шога. Паша ача-ава-влакын штабышт дене пырля ышталтеш.
«2019 ий гыч элыштына чумыр налмаште 1300 наре школым да 1700 йочасадым чоҥымо. Тидын деч посна ныл тӱжем утла школым капитально олмыктымо. Тений 1050 утла общеобразовательный тӧнежым уэмдаш да 360 у тунемме верым чоҥаш палемдыме. Федеральный бюджетым чумырымо годым ты пашаш ресурс кӱлеш наре ойыралтеш. Йоча-влак сай качестван образованийым йӧнан да жаплан келшыше кумдыкышто налшаш улыт. Тиде моткоч кӱлеш», – палемден Владимир Якушев.
Школым капитально олмыктымо программым илышыш пурташ тӱҥалтышым Россий Федераций президент Владимир Путин «Единая Россия» партийын съездыштыже 2021 ийыште ыштен. Ты программе 7300 наре школым авалтен, нунын кокла гыч шукынжо ял ден селалаште верланеныт.
32-шо №-ан школым ыштыме пашам республикым вуйлатыше Юрий Зайцев шке контрольыштыжо кучен. У тунемме верым чоҥаш чылаже 1,2 миллиард теҥге ойыралтын: федеральный бюджет гыч 691,1 миллион, республикысе гыч – 569,9 миллион, муниципальный гыч – 5,7 миллион.
«Партийын проектшым илышыш пурташ йӧным ыштымылан «Единая Россия» партийлан тауштем. Тиде у школ, Владимир Владимировичын каласымыже мемнам моткоч кумылаҥда. А кызытлан ончылнына – эше кум школым чоҥымо паша. Тиде – Руэм посёлкышто 725 веран тунемме вер да концессий ойпидыш дене ышталтше кок общеобразовательный тӧнеж. Мутат уке, у школым чоҥаш йӧным пуышо чыла проектыш ушнаш тӱналына. Нуно мыланна моткочак кӱлыт», – каласен Юрий Зайцев.
Марий Эл вуйлатышын пресс-службыжын уверже негызеш Г.Кожевникова ямдылен.
