1 февраль гыч россиян-влакын илышыштышт мо вашталтеш?
Ава капитал тылеч ончыч палемдыме деч кугу лиеш
Россий Федерацийын Паша да социал аралтыш министерствыжын палдарымыж почеш, 1 февраль гыч икымше йочалан ава капиталын суммыжо 524,5 тÿжем теҥге марте кугемеш.
Еш икымше йочалан выплатым налын огыл гын, кокымшо йочалан тудым 693,1 тÿжем марте кугемдат. Налын гын, 168,6 тÿжем теҥгем палемдат.
Кок случайыштыжат ава капиталым 8,4 процентлан индексироватлыме – тидыже тылеч ончыч палемдыме деч шукылан.
Пенсият кугемеш
Пенсийым 8,6 процентлан кугемдыме нерген законыш Россий Федераций президент Владимир Путин кидпалыжым январь мучаште пыштен. Документ дене келшышын, индексацийым 2022 ий 1 январь гыч ыштат.
Тыгеже пенсийым 2022 ий 1 январь гыч 5,9 процентлан кугемдыме. Февральыште пенсионер-влаклан 8,6 процент марте кугемдыме пенсийым да январьлан 5,9 ден 8,6 процент кокласе ойыртемым, 2,7 процентым, ешарен тÿлат.
Кугыжаныш Думын икымше вице-спикерже Александр Жуковын мутшо почеш, тиде вашталтыш деч вара Российыште пенсий кокла шот дене 18984 теҥге лиеш.
Моло пособият вашталтыт
1 февраль гыч азам ыштымылан пособий ик тÿжем утла теҥгелан кугемеш да 19981 теҥге лиеш. Тудо Российысе чыла ешлан палемдалтеш, тыгодым ача-аван доходышт, кушто да кöлан пашам ыштымышт шотыш огеш налалт. Икманаш, тудо пашам ыштышыланат, пашадымыланат ик семын палемдалтеш. Ешыште иканаште икмыняр йоча шочеш гын, пособийым кажныжлан тÿлат.
Декретный манме выплатымат индексироватлыме: 140 кечылан эн шукыжо 360164 теҥгем тÿлат, эн шагалже – 62675 теҥгем, а икымше йочам ончымо шотышто пособий 7493 гыч 31282 теҥге марте лиеш.
Пособийым призывник-шамычын ватышт ден йочаштланат тÿлат. Икымше случайыште призывникын мÿшкыран пелашыже 32420 теҥгем ик гана налын кертеш. Кокымшо случайыште призывникын кум ияш марте икшывыжлан аваже але опекунжо 3895 теҥгем тылзе еда налаш праван.
Российыште йочам ешыш ашнаш налме годымат ик гана тÿлыман выплатым пуат. Шым ий деч кугурак але начар тазалыкан икшывым ончаш налше-влаклан эн шукыжо 156429 теҥгем тÿлен кертыт. Икмыняр йочам ончаш налме годым выплате кажне икшывылан ойыралтеш.
Тÿнен илыше мÿшкыран ÿдырамаш-влак регионышто пашам ыштен кертше еҥын илен лекташ кÿлмö окса кугытшо гыч пел суммыжым налаш праван улыт. Тыгай выплате ешысе ик еҥлан шотлымаште доходын илен лекташ кÿлмö окса кугытшо деч кугу огыл улмо годым палемдалтеш.
Боевой действий-влакын инвалидышт ден ветераныштлан, Совет Ушем да Россий Герой-шамычлан, тыгак льготан тÿшкаш пурышо моло еҥ-влаклан тылзе еда тÿлыман выплатым 8,4 процентлан кугемдат.
Бизнеслан полшат
1 февраль гыч изи ден кокла бизнес, самозанятый да шке пашам почаш шонышо-влак изи да кокла предпринимательствын цифровой платформыштыжо полышым налын кертыт.
У цифровой платформо бизнесмен-шамычлан полышым адресно ойырен налеш. Тылеч посна шке пашам вияҥдыме тÿрлö йыжыҥыште кÿлеш лийше услугым налаш йöным ышта. Чыла паша дистанционно шукталтеш. Тидланже ведомство-влак кокласе электрон вашкыл системе гоч гына эртыман.
У цифровой платформо дене экспериментым 2025 ий 1 февраль йотке эртараш палемдыме.
Банк вкладлан налог лиеш
1 февраль гыч банк вклад оза-влакын доходышт гыч налогым кучен кодымо нерген законын эше 2020 ийыштак пеҥгыдемыме положенийже-шамыч вийыш пурат. Тыште палемдыме суммым эртыше процент нерген ойлалтеш. Тудым кажне ийын тиде формул дене шотлат: ик миллион теҥгем Рÿдö банкын налог пагытын (календарный идалыкын) 1 январьысе ключевой манме ставкыжлан шукемдат.
Эртыше ий тÿҥалтыште Рÿдö банкын ключевой ставкыже 4,25 процент лийын, тугеже 2021 ийлан процент шот дене вкладыш ешарыме 42,5 тÿжем теҥге гыч налогым кучен огыт кодо.
Банк вклад шотышто идалыкаш процент тиде суммо нарак але тудын деч шагалрак лектын гын, налогым кучен огыт кодо. Ик але икмыняр вклад дене доход тиде показатель деч кугу – озаже кугыжанышлан 13 процент налогым тÿла.
Парыман-шамычлан илен лекташ кÿлмö кугыт оксам кодат
1 февральыште вийыш пурышо закон парыман-шамычын счётыштышт илен лекташ кÿлмö кугыт оксам тÿкыде кодаш гарантийым пуэн. Тидланже исполнительный производствым шуктышо суд пристав-влакын подразделенийышкышт йодмашым пуаш кÿлеш.
Тыгай йöным алиментщик деч моло чыла гаяк парыман-влаклан ыштыме.
Закон почеш парымлан пашадар але пенсий окса гыч пелыжым тылзе еда кучен коден сеҥат. Тидлан кöра пенсионер ден инвалид-шамыч илен лекташ ситыше шийвундо деч посна кодын кертыныт.
Калыкым аварий лийын кертме лÿдыкшан пöртыштö илыме верым налме деч арален кодат
1 февраль гыч пöртын аварий лийын кертме лÿдыкшан улмыж нерген уверым Кусараш лийдыме погын ик кугыжаныш реестрышкыже пуртымо нерген закон вийым налын. Тиде документ граждан-влакым пöртын аварий лийын кертме лÿдыкшан да илаш йöрдымö улмыж дене палдараш йöным ышта.
Шуко пачеран пöртын аварий лийын кертме лÿдыкшан да илаш йöрдымö улмыжым пеҥгыдемдыме нерген пунчалым лукшо регионысо да муниципал кучем орган-шамыч шке пунчалышт нерген уверым Росреестрыш колташ тÿҥалыт. А туштыжо нине уверым ЕГРН гыч выпискыш пуртат.
Иза-шольо шÿгарлаш у ГОСТ почеш тояш тÿҥалыт
1 февраль гыч Российыште военный конфликт, тыгак тынысле жапыште чрезвычайный ситуаций годым колышо айдеме ден янлык капым иза-шольо шÿгарлаш жапым шуйкалыде тойымо шотышто ГОСТ вийыш пура.
Документ дене келшышын, тойымо верым палемдыме деч ончыч чоҥымо правилым, калыкын илемже марте кужытым, мландын рельефшым да йÿшаш вÿдын верланымыжым шотыш налаш кÿлеш.
Верысе кучем-влак тынысле пагытыште жапым шуйкалыде тояшлан средства шапашым ямдылышаш улыт.
Кинош – «Пушкин карт» дене
1 февраль гыч Россий Федераций Культур министерствын да Кино фондын полшымышт дене войзымо шкенан элысе кинош кинотеатрлаште «Пушкин карт» дене тÿлен пураш лиеш. Вич тÿжем теҥге номиналан «Пушкин карт» гыч россий кинолан идалыкыште кок тÿжем теҥге марте кучылташ йöным ыштыме.
«Пушкин картым» 14-22 ияш россиян-влак Кугыжаныш услуго порталыште оформитлен кертыт. Тудын дене кинотеатр деч посна эше музейыште, библиотекыште, театрыште, концерт залыште да моло культур площадкыште пайдаланаш лиеш.
Таиландыш – карантин деч посна
1 февраль гыч у коронавирус инфекций деч вакцинацийын тичмаш курсшым эртыше йот турист-влаклан, ты шотыштак россиян-шамычлан, Таиландыште карантиныште шинчаш огеш кÿл. Но путешественник-влак коронавирус дене черланен кертмыштым кок гана тергыктышаш улыт: икымше гана – Таиландыш толмекышт, кокымшо гана – тиде элыште илыме визымше кечын.
«Платон» шергын шуэш
1 февраль гыч федеральный корнылан зияным ыштымылан кугу грузым шупшыктышо транспортла деч оксам погышо «Платон» системыште тариф вашталтын. 12 тонн утла нелытан грузовикын ик километр коклам кудал эртымыжлан ынде 2,54 теҥгем тÿлыман, тымарте 20 ырлан шулдырак лийын. Тарифым эртыше ийын инфляцийже негызеш кугемдыме.
Официальный увер почеш, «Платон» системыште 12 тонн деч кугурак нелытан 1,5 миллион утла грузовикым регистрироватлыме.
Лаштыкым М.ИВАНОВА ямдылен
