Кодшо рушарнян, 15 декабрьыште, Йӱштӧ Кугыза-влак Йошкар-Олан уремлаж дене тӱшкан ошкылын эртеныт. Тиде мероприятий «Марий теле» фестиваль кышкарыште эртен.
Стартым нуно Патриарший площадьыште налыныт. Чылаже 120 утла Йӱштӧ Кугыза погынен. Нуно тушко мийыше йоча ден кугыеҥымат пырля кушталташ ӱжыныт. Тыгак икшыве-шамычым пӧлек мешакышт гыч лукмо тамле костенеч дене сийленыт. Туштак коча-шамыч Йошкар-Оласе управляющий компаний-влаклан пайрем кожым пуэденыт. Нине иман мотор-влакым рӱдоласе кудывечылаште шогалтат.
Патриарший площадь гыч йомакысе чочой-влак Чарла Кремльыш кусненыт. Тушто нуным марий Йӱштӧ Кугыза ден Лумӱдыр вашлийыныт. Киров область гыч Йӱштӧ Кугыза Кремльын сценыштыже марий Йӱштӧ Кугызалан юзо тоям кучыктен. Вара ӱдыр-рвезе-влак ача-авашт дене пырля лумым кышкылт модыныт, кидым кучен, йыр пӧрдыныт.
Чарла Кремль гыч кугыза-шамыч чыланат Йошкар-Оласе тӱвыра да каныме рӱдӧ паркыш кусненыт. Тушто нуным Икымше-влакын толкыныштын волонтёржо-шамыч вашлийыныт. Нуно ур, маска, моло оҥай персонаж семын чиеныт да чыланыштым куштыктеныт, тӱрлӧ конкурсыш ушнаш ӱжыныт. Паркыште Йӱштӧ Кугыза ден йоча-шамыч ур-влакым пӱкш дене пукшеныт. Йомакысе коча-шамыч кылмыктен да моло модыш дене модыктеныт.
Парк гыч чыланат имнешке ӱдыр-влак почеш, весела муро семым колыштын, Комсомольский урем дене Ленин лӱмеш площадьыш ошкылыныт. Тушто весела пайрем касым эртареныт, площадьыште шогышо да моторын сӧрастарыме пайрем кожым чӱктеныт.
– Тиде пайрем — йоча-влакын веле огыл эн вучымо пайремышт. Таче мемнан деке тӱрлӧ кундем гыч Йӱштӧ Кугыза-влак толыныт да пайрем шӱлышым конденыт, – Йошкар-Ола мэрын пашажым жаплан шуктышо Антон Трудинов мероприятийыш погынышо-влакым шушаш У ий дене саламлен.
Михаил СКОБЕЛЕВ,
Лидия ШАБДАРОВА
М.Скобелевын фотожо
