КУЛЬТУР ДА ИСКУССТВО

Шапкин — самырык тукымлан сай пример

Республикысе Национальный президент искусство школышто усталык шӱлышан самырык тукымым куштат, сандене тушто чӱчкыдынак чапланыше сӱретче, музыкант, семмастар да моло лӱмлӧ еҥ дене вашлиймашым эртарат. Ты гана школын коллективше да тунемшыже-влак ончылно РСФСР-ын сулло артистше, кум книган авторжо, флейтист Виталий Шапкин лийын.

Эн ончычак Виталий Владимирович залыш погынышо икшыве да туныктышо-влаклан, йоча пагытшым порын шарналтен, школышто тунемме, сымыктыш тӱняш икымше ошкылым ыштымыж нерген каласкален. Школ деч вара Шернур районысо Тумерсола ялын эргыже И.С.Палантай лӱмеш музыкальный училищыште, тыгак Моско консерваторийыште мастарлыкшым шуарен. Вузым тунем пытарымекыже, Йошкар-Олашке пӧртылын да сымыктыш аланыште чолган пашам ышташ тӱҥалын. В.Шапкин кушкын толшо тукымым музыклан шӱмаҥдымаште ятыр ий тыршен, музыкальный театрын оркестржын солистше лийын. Сольный концертше дене Российысе олалаште веле огыл, Венгрийыштат, Эстонийыштат лийын. А тидын нерген йоча-шамыч поснак куанен колыштыныт. Таче кечылан тале музыкант-флейтист Э.Сапаев лӱмеш опер да балет академический театрын оркестрыштыже шокта да кызытат мастарлыкше дене калыкым куандара. Тудын тыршымыж дене марий семмастар-влакын произведенийышт театр сценыште орган, флейте почеш йоҥга.

Вашлиймашке чумыргышо йоча-влакат Виталий Владимировичлан ятыр йодышым ямдыленыт ыле. Нуно музыкантын икымше гана концертым эртарымыже, театрысе йӧратыме спектакльже да моло нерген йодыштыныт.

— Икымше концертым 1964 ий  февральыште музыкальный училищыште кокымшо курсышто тунемме годым эртаренам, — чонжым почеш В.Шапкин. — А театрыште эн чот Римский-Корсаковын «Царская невеста» оперже келша.    

— Тале музыкант лияш манын, кечыште мыняр жапым музыклан ойыренда? — шоктен йодыш.

— Кажне кечын кум, ныл, вич шагатым…

Тиддеч посна уста флейтист музыклан шӱман ешыже нергенат кӱчыкын каласкален. Тудо моло ача семын кажне шочшыжын сеҥымашыжлан куанен да кызытат тидын дене куанен кугешна.  

Икманаш, сымыктыш тӱняште сеҥымашыш шуаш да калык пагалымашым сулаш манын, В.Шапкинлан шуко тыршашыже, тунемашыже логалын. Республикыштына тудын гай тале музыкантна-влак шукынрак лийыт гын, шочмо калыкна, Марий мландына ончыкыжымат чапланаш тӱҥалеш. 

А.Байкова

В.Тумбаевын фотожо.

Опубликовать в Одноклассники

Добавить комментарий