27, 28 февральыште М.Шкетан лӱмеш Марий национальный драме театрыште драматург Зинаида Долгован возымо «Эрла ял пайрем» пьесыж почеш шындыме тыгаяк лӱман спектакльын премьерже лиеш.
Тудым режиссёр Василий Домрачев шында. У паша нерген тыгерак ойлыш:
– Тиде материал моткоч оҥайын шочын. Историйже теве могай: икмыняр ий ончыч театрын тӱҥ сӱретчыже Сергей Таныгинын кабинетыштыже Юрий Русанов да монь шинчыме годым Роман Алексеев толын пурыш. Ӧрмалгышырак ыле. Тудо ачаж дене пырля Моркыш, шочмо ялышкыже, миен коштмыж нерген каласкалыш. Ачажын пӧртшат уке, олмыжо веле кодын улмаш. Еҥын ойлымыж гыч веле ялын историйже, Кугу Отечественный сарыш кӧ-шамычын кайымышт да моло нерген пален налын. Каласкалымыже мыйын чонем тарватыш, да тунамак сценыш тыгай сынан спектакльым лукмо нерген шоналтышым. Теме моткоч кӱлешан, вет ял-шамыч пытен толыт, самырык еш-влакат ола воктене «пызнаш» тӧчат. Шочмо ялыште мланде кумдыкым налын, изирак пӧртым чоҥет гын, уда мо? Мый Володя Матвеев деке лектым. Тудо пьесым возаш тӱҥале да, очыни, жапше чӱдылан кӧра ыш шукто. Ӱмаште тиде шонымашем нерген драматург Зинаида Долговалан каласышым. Тудо сайлан шотлыш да икмыняр жап гыч пьесым возенат кондыш.
У постановкын жанрже – комедий, но шонаш таратыше. Композитор Сергей Маков пашашке кумылын ушныш, тудо спектакльым музык дене сӧрастара. Авамын мурыжымат пуртенам.
– Рольым модшо артист-влакын лӱмышт спектакльысе геройын дене икгай.
– Зинаида Васильевна артист-влаклан келшыше образым кычалын. Сектакльыште Луначарский лӱмеш ГИТИС-ым 1985 ийыште тунемын лекше йолташем-влак утларакше модыт: Иван Смирнов – Металлист Йываным, Юрий Алексеев – Коммунист Юрикым, Олег Кузьминых – Мамут Олегым, Маргарита Медикова – Пкемон Ритам, Антонина Антонова – Чопак Тоням…
Алевтина БАЙКОВА
Авторын фотожо
