Кодшо тылзын Звенигово, Волжск, Медведево районлаш миен толаш пиал шыргыжалын.. Амалже – Регион кокласе этнотуристический семинар «ЭтноБлогинг Тайм». Ты проектым «Интеллектуал» коммерческий огыл организаций илышыш шыҥдарен. Тушко Марий Эл, Удмуртий, Чуваший республикла, Ленинград область, Новосибирск гыч участник-влак чумыргеныт.
Марий блогер-влак дене вашлиймаш
Семинарын икымше кечынже марий блогер-влак дене вашлийна. Тиде Володя Матвеев, Татьяна Кибаева, Надежда Имаева да Качерий бавай (Екатерина Александрова). Нуно шке блогышт дене палдареныт, ты аланыш ушнаш шонышо-влаклан икмыняр каҥашым пуэныт.
Теве Татьяна Кибаеван YouTube-со «Атмосфера счастья» блогшым 140 тӱжем подписчик эскера. Тудо тушто кызытсе темылан келшыше йодыш-влакым нӧлталеш, ола мучко лектын коштмыжым ончыкта. «Видеом ямдылаш шуко жап кая. Мутлан, ик ролик арня наре войзалтеш. Монтажым ышташ иктаж кандаш шагат кӱлеш. Ты пашалан пижында гын, кажне кечын тыршыман. Уке гын, интернетысе йолташда-влакын чотышт иземеш», – палемдыш тудо.
Участник-влак Качерий бавайын тыршымыжым кӱкшын аклышт. Тудын лаштыкше таче кечылан келшыше, мыскара сынан. Кызытсе жапыште калыкын кумылжым нӧлташак кӱлеш.
Йӱкын вийже
Шуко профессийыште йӱк ик эн тӱҥ верым налеш. Туныктышо, мер пашаеҥ, артист… Блогер-влакат лывырге йылман лийшаш улыт. Тидын нерген «Россия» общественный телевиденийын вӱдышыжӧ, продюсер, «Энергия речи» проектын вуйлатышыже Ангелина Грохольская ден кино да театр актёр, stend-ap комик Денис Николин каласкаленыт. Нуно мемнан дене Звенигово район «Салика» каныме базыште кок кече пашам ыштеныт, тренинглам эртареныт, видеом чын войзаш туныктеныт.
«Еҥ ончыко лекше оратор техникым палышаш, шке кӧргӧ куатше дене колыштшым сымыстарен кертшаш, шонымашыжым умылтарен моштышаш. Тиде кум палымашым иктыш ушен, сай выступленийым чоҥаш лиеш. Но иктаж-куштыжо йоҥылышда уло гын, ойгыраш огеш кӱл. Вет яндарын кутырашат, сценыште шкем кучашат тунем шуаш лиеш. Теве писынлудыш дикцийдам вияҥдаш полшен кертеш. Воштончыш ончыко шогалын, ойлышаш шомакдам каласеда гынат, пеш пайдале. Тиде кузе коймыдам, тарванылмыдам ончылгоч ужын, кӱлеш семын тӧрлаш полша. Эшежым пачаштарыме текст ушеш сайынрак возеш», – палемдыш Ангелина.
Тыгак спикер-влак сценыште ик темп дене ойлаш ышт темле. Пеш шып гын, колыштшо-влак мален колтат, утыждене кычкырымат лачеш огеш тол. Кутырымо йӧре мыскарам ыштыме сайлан шотлалтеш.
Кушто гына лийын огыл
Тӱнямбал мучко коштшо еҥ-влакым эскераш поснак оҥай. Кушто гына нуно огыт лий, мом гына огыт уж! Теве журналист, блогер, Тravel-Russia медиа ушемын вуйлатышыже Мария Нелесова тӱрлӧ эллаш миен коштын гынат, Марий Эл Республикыш икымше гана толын. Тудо мыланна лекцийым Юл эҥер воктене «Звениговский» каныме базыште лудын. Шке фотосӱретше-влакым ончыктен, ты пашаште икмыняр темлымашым пуэн.
Мутлан, шарныктыш воктене але чапкагаз дене войзалтме шотлан ок тол, манын палемден. Тыге ыштен чылан кертыт, а сай фотограф изи ужашымат ужын моштымашыж дене ойыртемалтеш. Шке блогым вӱдышылан тӱшка фотом ыштыме – йоҥылыш. Ончышылан кӧ дене шогет – садикте. Адакшым блог-влак телефон гоч эскералтыт. Еҥ коклаште тендам ужын шукташ манын, кугемден ончыман, тыгодым качестве локтылалтеш.
Звенигово ола, Юл эҥер, курык, тораште гӱжлышӧ чодыра – чыла тиде семинарын участникше-влакым у пашалан, у проектлан кумылаҥден да вийым пуэн.
Кичиер ер воктелне
Умбакыже нимучашдыме корно Волжский районышто верланыше «Кичиер» санаторийыш наҥгаен. Тушто лийме икымше кечынже спикер мемнан ончыко онлайн йӧн дене пайдаланен лектын. Тудо калык кокласе кыл темымат нӧлталын. Мутем национальность паша шотышто Федерал агенствын пашаеҥже Айказ Микаелян нерген.
Кокымшо кечын бренд нерген мутланышна. Эксперт – Российысе калык-влакын Ассамблей советын председательжын икымше алмаштышыже Евгения Михалева.
Мом организаций, компаний нерген ойлат – тиде бренд. Тудо шкеж деке ӱшаным шочыкташ, моло коклаште ойыртемалтшым ышташ, оксамат налаш полшышаш. Кузе корабльым лӱмдет, туге тудо ийын кая маныт, садланак брендлан тиде – тӱҥ. Тыгак тудын легендыже да сынже лийшаш. Сынжым логотип гоч ончыктыман. Но ты сӱретым шот да радам дене ыштыман. Мутлан тудо проста, кок тӱсан лийшаш.
Эксперт семын личный брендым ыштымаште Евгения Абрамовна лу темлымашым пуыш:
- Аудиторийдам шымлыза. Нунылан чыным гына ойлыза.
- Илышдам ончыкташ ида ӧр. Тыге тендан деке ӱшан шочеш.
- СМИ-лан оҥай айдеме лияш тыршыза. Нуно тендан деке толыт гын, кылым кучаш тореш ида лий.
- Шке шонымашда дене интернет йолташдам палдарыза.
- Еҥ-влак дене мутланыза. Публичный лийза.
- Портфолиом погыза. Тыгак кид йымалныда шкендан нерген автобиографиян ямде текст лийшаш. Кӱлеш годым те тудым кучылт кертыда. Тыгак савыкташ йӧршӧ икмыняр фотосӱретымат ончылгоч ямдылыза.
- Кызытсе кечын улшо проблеме дене кылдалтше шонымашдам почын пуыза.
- Тыгак кузе тиде проблеме деч кораҥаш лиеш – темлыза.
- Моло деч ойыртемалтше лияш тыршыза.
- Статья-влакым возыза. Тендан нерген савыктыш уло гын, тудым чумырыза.
У проектлан сай тӱҥалтыш
Республик мучко коштмынан пытартыш верже – Медведево районышто верланыше «MariLand» каныме базе. Тушто проект паша дене «Gladway» медиапроект ден социал програме-влакым вияҥдыме фондын директоржо Владимир Вайнер палдарен.
«Проектым возымо годым шке вийлан ӱшаныман. Грант полыш деч поснат пашам виктарен колташ ӱнарда уло гын веле ты паша деке пижса», – палемден тудо.
Воктеныда улшо еҥ-влакым шекланыза. Иктын пӧлем уло, весе машинам виктара, кумшо шке шинчымашыж дене ӧрыктара, нылымше мура-кушта – чыла ты ресурсым, моштымашым иктыш чумырен, сай проектым шонаш да тудым илышыш шыҥдараш лиеш.
Семинар участник-влакат тыгак ыштышт. Кӧ мом моштымым шотыш налын, у проектлам возышт. А лектор кузе тудым кӱлеш могырыш виктарен колташ палдарыш. Ӱшанена: «ЭтноБлогинг Тайм» семинар кышкарыште шочшо шонымаш-влак сай лектышыш шуыт да калыклан шагал огыл пайдам кондат.
Лу кечаш семинар мучашлалте
Чеверласымаш Йошкар-Оласе «Башня» тӱвыра ончер рӱдерыште лийын. Организатор-влаклан тауштен, эртыше кечылам эше ик гана шарналтен, изи гына концертым ямдыленна. Умбакыжым «Дело вкуса» кулинар студийышке каенна. Туштыжо подкогыльым, ӱячам ыштенна, тамле шӱрым шолтенна.
Жап шиждымын эртен. Ты лу кечыште шинчымашна пойдаралтын, вашкылна пеҥгыдемдын. Тунемме йӧре республик мучкат коштын савырненна, каналтенат шуктенна. Пӱртӱснаже могай мотор! Кундемнан унаже-влакат тидым палемдышт да вес ганат толаш сӧрышт.
О.МОШКИНА
Ирина Павлован фотожо
