Шергакан лудшына-влак, «Майатул» лаштыкыште тендам Пермь кундемын ик самырык рвезыже Василий Епанов дене палымым ыштынем. Ме тудын дене икмыняр ий ончыч Йошкар-Олаште эртаралтше «Финн-угор калык поянлык» форумышто вашлийынна.
— Вася, тый ик гана ты форумыш Коми калык гыч лекше рвезе семын толынат, вес гана Удмурт университет делегацийыште улат ыле…
— Сыктывкарысе Питирим Сорокин лӱмеш кугыжаныш университетыште шинчымашым погем. Финн-угор калык-влакым шымлем. Кодшо ийын Удмурт кугыжаныш университетыш вуз коклаште вашталалтме программе дене тунемаш каяш пиал шыргыжын ыле. Форумыш толмекем, кокыт веле огыл, кум кундем мылам лишыл лийын, тиде: Пермь, Коми да Удмурт.
Коми-пермь йылмым шымлен, Марий Элыште эртаралтше конференцийыште вием икмыняр гана тергенам. Кодшо ийын пашамлан 1-ше верым пуэныт.
— Инстаграм лаштыкышкет то ик, то вес ола гыч фотосӱретым вераҥдет.
— Тӱрлӧ кундемым ужын кошташ мылам моткоч келша. Кужу жап ик верыште лийын ом керт: корно шкеж деке ӱжеш. Путешествий шӱлыш чоным ырыкта.
Мый историйым йӧратем. Садлан у олаш мийымеке, тудын ожнысо илышыжым, кумдан палыме еҥже-влакын илыш корныштым пален налаш тыршем. Мутлан, Римыште лийме годым эн ондак колизейыш вашкенам.
Кодшо ийын Венгрийысе «Хунгарология» университетыш кеҥеж жаплан тунемаш миен коштынам. Ты эл пеш келшен. Садланак, палымем деч Балашии институт нерген рашемдымеке, тушко каяш кумылаҥынам. Тыге, кӱлеш документым поген, шке университетыштем академий отпускым налын, ты тунемме верыш логалынам.
Венгрийыште лийме годым пошкудо элыш, Словакийыш миенам. Тидланже самолёт, поезд, машина денат пайдаланаш кӱлешлык лийын огыл. Кӱварым вончет веле – вес эл.
Тыгак Финляндийыште, Польшышто, Италийыште лияш пиал шыргыжын.
— Кажне вер-шӧр шӱмеш могай-гынат кышам кода. Марий Эл тылат келшен?
— Марий Эл – ужар республик. Ты кундем пӱртӱсшӧ дене ойыртемалтеш. Йошкар-Оласе Изи Какшан серже мом шога! Тушто жапым эртараш — куан. Ола оралтылаште пеш шуко марла возымым вашлийынам. Тидыже верысе калыкын шке йылмыжым, тӱвыражым аклымыжым ончыкта. Тыгак мылам, студент семын, Марий кугыжаныш университетын корпусшо-влак да тудын тӱшкагудыжо келшеныт.
— Яра жапым кузе эртарет?
— Канен шинчаш ом йӧрате. Шочмо йылмым интернетыште шаркалем, икмыняр лаштыкым вӱдышыла лач тудым гына кучылтам. Финн-угор калык тӱвырам шымлаш келша. Финнла, удмуртла, венгрла мутланен моштем. Ончыкыжым ала марлат мутланаш тӱҥалам. Икмыняр мутшым палемат.
Кызыт шочмо Карбас ялыштем улам. Сурт сомылым шуктем. Чодыраш снегым, эҥыжым, поҥгым погаш коштам.
Ялысе клуб пелен спортзал уло. Футбол дене модаш коштам. Тӱрлӧ соревнованийыште шочмо кундемемын чапшым аралем. Шукерте огыл районысо таҥасымаште икымше верым налынна ыле.
— Тау, Вася! Ончыкылык корнет волгыдо лийже.
— Тау!
О.МОШКИНА
