Самоизоляций илыш кугу вашталтышым пуртен. Кажне кечысе пашат кызыт вес семын кая. Кузе самырык-влак ты жапым эртарат? Айыста шкешт деч пален налына.
— Светлана Демьянова, Параньга район:
— Ынде жап шуко лектын манын ом керт. Молан манаш гын, дистанционно тунемам. Чыла радам, жап почеш ыштыман. Тыгак туныктышо улам, йоча-влакым компьютер гоч туныктем, мöҥгысö пашаштым тергем. Самоизоляцийым ялыште эртарем, тидыже сай. Тыште чонлан поснак куштылгын чучеш.
— Ирина Ильина, Оршанке район:
— Шкем вияҥдаш полшышо книга-влакым лудам, тӱрлö интернет курсым эртем, кино-влакым ончем. Икшывем-влаклан дистанционный тунеммаште полшем. Тыгак ялышке юж дене шӱлалташ лектын пурем. Кочкаш ыштем да пöртым эрыктем.
— Екатерина Кошкина, Морко район:
— Тунемам, кажне кечын заданийлам ыштем, лекцийым возем. Исторический кино-влак деке пеш шӱмаҥынам. Кумыл лекмеке семын книгам лудам. Кызыт теве Борис Акунинын «Пелагия и красный петухшым» лудаш тӱҥалынам. Тиде пагытым пайдалын эртарыман, вет тудо мыланна арам пуалтын огыл…
— Асия Кириллова, Звенигово район:
— Туныктышын пашаже шукемын гына. Кажне кечын уроклан ямдылалтман, йоча-влаклан заданийым колтедылман. А вара чыла тергаш кӱлеш.
— Эльвира Петрова, Морко район:
— Тиде пагытын кок могыржо уло. Мый сайже нерген гына каласымем шуэш. Ме эре жап огеш сите манын ойлена да ала-кушко вашкена ыле. Кызыт кажныже шкалан да лишыл еҥ-влаклан жапым ойырен кретыт. Мыят самоизоляцийым ешем дене эртарем. Тыгак тӱрлö хоббилан чонем почынам.
О.МОШКИНА
