Самырык тукымым ончен, илышнан ончыкылыкшо сай манын, пеҥгыдын ойлаш лиеш. Тӱрлӧ аланыштат нуно шкеныштым ончыктат. Тачысе лаштыкын унаже проект-влакым чӱчкыдын воза. Мутем чолга рвезе Даниил Лебедев нерген. Тудын дене ме тений кеҥежым Самара областьыште эртаралтше «iВолга» форумышто палыме лийынна.
Даниил Йошкар-Олаште шочын-кушкын. Тыштак ила. Кызыт Юл кундем кугыжаныш технологий университетыште 1-ше курсышто шинчымашым пога.
— Интернет лаштыкетым ончалмеке, оласе самырык тукымын мер илышышкыже чӱчкыдын ушнымет коеш. Тугеже тылат тиде лишыл?
— Школышто тунемме годым шуко мероприятийыш, конкурсыш эреак коштынам. Тиде шкем вияҥдаш йӧным пуэн, калык ончыко лӱдде лекташ туныктен. Варажым участник веле огыл, организатор рольымат мылам ӱшанен пуэныт, вӱдышӧ семынат шуко тыршенам. 9-10-шо класслаште мыйым мер ушемын лидержылан ойырен налыныт.
— Проект пашат дене палдаре.
— 11-ше классыште самырык коклаште предпринимательствым вияҥдаш полшышо «Мыйын икымше бизнесем» конкурс нерген пален налынам. Тунам интернет кевыт дене пайдаланен, брендан вургемым ужалаш «Марий стор» проектым возенам. Тудым кӱкшын акленыт да Москош 3 кечаш бизнес-интенсивыш путёвкым кучыктеныт. Тушто мый, улшо проектым але весым эртараш, 20 тӱжем оксам сеҥен налынам. Шонымаште «Пуда ден чӧгыт» проект лийын. Тиде пудам пудален, шӱртым моторын ваш ушен, картине-влакым ышташ. Тыгай технике «стрит-арт» маналтеш. Тиде паша дене тунам Сочи оласе «Сириус» образовательный рӱдерыш логалынам. Тушто 10 кече туныктеныт, мастер-класс-влакым эртареныт, шуко эксперт шке опытше дене палдарен. Тушто налме шинчымашым мый кызытат кучылтам. Тиде хоббием мылам эркын оксамат кондаш тӱҥалын, бизнесыш савырнен манам гынат, йоҥылыш ом лий, шонем. А чылажат интернетыште тиде техникым кучылтын ыштыме кроссовкын фотосӱретшым ужмо деч вара тӱҥалын. Тудо картине мылам пеш келшен, да тыге иктажым ыштен ончаш кумылаҥден. Эн ончыч кумдан палыме «Суприм» брендан вургем компанийын логотипшым ыштен онченам. Вара келшыше кроссовкат «шочын» (снимкыште). Тиде проектымак вияҥдаш шонен, «iBолгыш» миенам.
— «Пуда да чӧгытын» ончыкылыкшо могай?
— Шке студийым почнем. Тушко толшым картине-влакым ышташ туныктынем. Мутлан, йоча-влаклан тиде пеш пайдале. Тыште нунын кидышт лывырга, чытышышт пеҥгыдемеш. У ий, 8 март, 9 май да моло пайрем вашеш мастер-классымат эртараш пеш сай лиеш ыле. Йодмо почешат ышташ тӱҥалам.
— Юзо вийлан ӱшанет?
— Кӱлеш жапыште, кӱлешан верышке логалын, тиде фотосӱретым ом уж ыле гын, ала кызыт йӧратыме пашамым ом тӱҥал ыле. Вара тиде «чудо» манмет огыл мо? Ӱшан тиде сай, но тыгодым кава гыч волтен пуымым вучен шинчыман огыл. Шонымаш шукталтме верч тыршыман. Нелылыкат корнышто лиеш. Яра кийыме годым веле куштылго. Мыят, мутлан, шуко гана «молан тиде тылат кӱлеш», «лач жапым арам эртарет» манме мутым колынам.
— Даниил, 30 декабрьыште шочмо кечет манын ойлышыч, ме тыйым тиде пайрем дене да У ий дене саламлена. Пиалан лий!
— Тау!
О.МОШКИНА
