Марий Эл Республикын Конституционный судшылан 20 ий темын. Тидын лӱмеш 19 июньышто торжественный погынымаш лийын.
Марий Эл вуйлатыше Александр Евстифеевын лӱмжӧ дене аппаратын пашаеҥже ден судьяже-влакым Марий Эл Республикын министрже – Марий Эл Республик вуйлатышын полномочный представительже Николай Коротков саламлен. Александр Евстифеев судын моткочак кӱлешан пашам шуктымыжым палемден.
Пайрем дене коллективым тыгак республикын Кугыжаныш Погынжын еҥже-влак, Верховный да Арбитраж суд-влакын председательышт, отставкыште судья, Марий Эл Республикын Рӱдӧ сайлымаш комиссийжын председательже Ирина Татаринова, Марий Элыште Айдемын праваже шотышто уполномоченный Лариса Яковлева да моло уна-влак саламленыт.
Конституционный судын председательже Александр Баранов поро мутым да тыланымашым ойлышо-влаклан тауштен да палемден: ведомствын тӱҥ поянлыкше – тиде судышто пашам ыштыше еҥ-влак.
Л.Камалетдинова.
