Марий Элым вуйлатыше Александр Евстифеевын кӱштымыж почеш социальный ден шинчымашым пуымо тӧнежлаште дезинфекцийым эртарат.
Республикыштына у коронавирус инфекций дене кылдалтше сӱретын начареммыжлан кӧра Россий МЧС-ын Марий Элысе тӱҥ виктемжын, тыгак помещений кӧргыштӧ дезинфекций ден специальный обработкым ыштыме оборудованиян да технический средстван моло федерал силовой структурын пашаеҥышт регионнан социально кӱлешан да шинчымашым пуымо тӧнежлаштыже санитарный обработкым эртарат.
Тиде паша нерген таче эртарыме совещанийыште Марий Элым вуйлатыше А.Евстифеевлан правительстве председательын алмаштышыже Степан Воронцов каласкален.
«Александр Александрович, Тендан кӱштымыда почеш 29 октябрь кугарня гыч ме нине пашам социально кӱлешан объектлаште – илалше ден ветеран-влакын пӧртлаштышт, интернатлаште, тунемме корпуслаште, вуз-влакын тӱшкагудылаштышт – эртараш тӱҥалынна. Дезраствор шотеш Йошкар-Оласе «Геникс» предприятийын растворжым Роспотребнадзорын темлыме пропорцийже дене кучылтына. Задачым шындыме, чыла паша жапыштыже да сайын шукталтеш», – увертарен тудо.
Дезинфекций ден санитарный обработкым 36 объектыште 3 ноябрь марте эртараш палемдыме.
А.Евстифеев социальный тӧнежлаште дезинфекцийым эртарыме пашам кӱлешан семын палемден, вет палемдыме верлаште у коронавирус инфекций дене палынак писын черланен кертше граждан-влак илат, да тиде пашам шуктышо-шамычлан республикыште пандемий дене кучедалаш полшымыштлан тауштен.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен