29 февральыште Марий Эл Кугыжаныш Погынын нылле кокымшо сессийыштыже депутат-влак 20 йодышым онченыт.
Икмыняр законодательный акт верысе шкевиктем да административно-территориальный шеледымаш йодыш-влак дене кылдалтын. Парламент Килемар районысо Килемар ола шотан илем ден вич ял шотан илемым ик муниципал образованийыш – Килемар муниципал округыш – ушымо нерген законым пеҥгыдемден. Вашталтышын тӱҥ цельже финанс ден кадр ресурсым иктыш ушымо, бюджет средствам пайдалын кучылтмо кӱшеш виян верысе шкевиктемым ыштыме дене кылдалтын.
Йошкар-Ола округын генеральный планже дене келшышын, рӱдоланан чекшым палемдыме, Шернур ден Советский районласе илем-влакым иктыш ушымо нерген пунчалым пеҥгыдемдыме нерген законым приниматлыме.
Депутат-влак Кужэҥер районысо Кульшит ялым Ананурыш, У Торъял районысо Кугу Кемсола ден Изи Кемсола яллам Токтарсолашке, кок Элеволкым иктыш, Пактек ялым Макматыш, Эшпайродо ялым Кугу Нурмыш ушымо дене келшеныт, Марий Эл ден Чуваш республик-шамыч кокласе чекым палемдыме нерген келшыкым пеҥгыдемденыт.
Сессийыште кугыжаныш профессиональный образовательный организацийлаште очно тунемше-влакын стипендийыштым «Марий Эл Республикыште образований нерген» закон дене пеҥгыдемдыме нормативлан келыштареныт. Кызыт тудын кугытшо – 600 теҥге. Тыгак республикын кугыжаныш погыжым федеральный почто кылын организацийжылан яра пайдаланаш пуаш йӧным ыштеныт. Республикысе икмыняр законым федеральныйлан келыштареныт. Мутлан, «Культур нерген» законыш ынде у умылымаш – «инвалид-влакын социокультурный реабилитацийышт да абилитацийышт» – пурталтеш, а республикын полномочий радамышкыже инвалид-влаклан социокультурный реабилитаций ден абилитацийым организоватлаш йӧным ыштыме паша ешаралтеш.
Тылеч посна Кугыжаныш Погын Йошкар-Оласе судебный районын 13-шо №-ан судебный участкышкыже Татьяна Паршинцевам да Медведево судебный районын 30-шо №-ан судебный участкышкыже Анастасия Смирновам мировой судья-влаклан палемден, Марий Эл Судья-шамычын квалифицироватлыме коллегийыштын йыжыҥъеҥже Мария Блинован полномочийжым жап деч ончыч чарен, «Марий Эл Республик законодательствын 2023 ийысе состоянийже нерген» докладым пеҥгыдемден.
Депутат-влак Марий Элысе элкӧргӧ паша министр Андрей Вырвичын да Кугыжаныш шотлымо палатын председательже Илья Акчуринын ведомствыштын 2023 ийыште ыштыме пашашт нерген отчётым колыштыныт.
Марий Эл Кугыжаныш Погынын 2023 ийыште шуктымо пашаж дене Кугыжаныш Погын председательын пашажым шуктышо Владимир Мухин палдарен.
М.ИВАНОВА
Марий Эл Кугыжаныш Погынын пресс-службыжын фотожо
