КУЧЕМЫШТЕ

Могай пиал шке пачеран лияш!

Марий Эл вуйлатыше тулык икшыве ден тошто илыме верла гыч куснышо-влаклан пачер деч сравочым кучыктен.

Тулык да ача-аван полышышт деч посна кодшо 13 самырык еҥ шке илыме веран лийын. Тыгак «2019-2025 ийлаште аварийный илыме фонд гыч граждан-влакым кусарымаш» республиканский адресный программылан кӧра Медведево поселкысо 71 еҥ жаплан келшыше йӧнан пачерыш илаш куснен кертыныт. Эше 6 аварийный пӧртым пужышаш улыт.

Пачер деч сравочым налше пиалан еҥ-влакым саламлышыжла, Александр Евстифеев палемден:

– Россий Федерацийын президентше Владимир Владимирович Путин федеральный правительствылан аварийный илыме верла гыч кусарымаш  программым писынрак шукташ задачым шында. Тудо ойлен: «Еҥ-влакым шӱкшӧ пӧртла гыч лукман». Тулык икшыве-влаклан илыме верым ситарымаш, тоштемше илыме фонд гыч еҥ-влакым кусарымаш – республик  правительствын ик эн ондак шуктышаш задачыже. 2018 ий гыч регионышто 636 тулык икшыве илыме веран лийын. Тышеч 112 – Медведево районышто. 2021 ий мучаш марте эше 19 еҥ Шойбулакыште у пӧртыш илаш пура. Идалык жапыште чылаже 190 тулык икшыве пачер деч сравочым налыт.

Ойлымыж почеш, ныл ий жапыште тиде пашалан республикын бюджетше гыч 600 млн. теҥге ойыралтын, федеральный бюджет гыч 300 млн. теҥге пурен. 2022 ийлан эшеат шукырак ышташ палемдалтеш: тулык икшыве-влак кокла гыч 343 еҥ шке пачеран лийшаш. Тышеч 14 – Медведево районышто.

Ончыкыжым 32 тӱжем квадрат метр аварийный илыме верым пужышаш да 1509 еҥым у пачерыш кусарышаш улыт.

23 ноябрьыште еҥ-влаклан сравочым кучыктымекше, Александр Евстифеев нунын кокла гыч иктыж дене – у пачер оза-ӱдырамаш дене – пачержым ончен савырнен да шке илыме веран лийше-влаклан чылаштлан пиалан кужу илышым тыланен.

 

 Марий Эл вуйлатышын организаций да аналитике виктемжын уверже негызеш Л.Камалетдинова ямдылен. 

 

Опубликовать в Одноклассники

Добавить комментарий