Таче, 6 июньышто, Марий Эл Кугыжаныш Погынын нылле кандашымше сессийыштыже депутат-влак вич йодышым онченыт.
Сессийын паша радамышкыже пуртымо йодыш-шамыч кокла гыч ик эн тӱҥжылан Марий Элын кандашымше созыв Кугыжаныш Погынышкыжо депутат-влакым сайлыме кечым тений 8 сентябрьыште палемдымым шотлыман. Тиде кечын республикысе калык 52 депутатым вич ийлан сайлаш тӱҥалеш.
Парламентарий-влак тыгак Йошкар-Оласе судебный районын 8-ше №-ан судебный участкышкыже Ирина Никитинам да Медведево судебный районын 27-ше судебный участкышкыже Руслан Шафиковым мировой судья-шамычлан пеҥгыдемденыт.
Сайлыме комиссийын председательже Ирина Татаринова 2024 ий мартыште Россий Федераций президентым сайлымашлан ямдылалташ да тудым эртарен колташ республикын бюджетше гыч ойырымо средствам – 45,4 миллион теҥгем – кучылтмо нерген отчётым ыштен. Тиде паша деч кодшо 194,8 тӱжем теҥгем бюджетыш уэш пӧртылтымӧ.
Кугыжаныш Погын тыгак Кугыжаныш Думо гыч пурышо федеральный закон-влакын кок проектыштым ончен. Нуным Россий Федерацийын правительствыже кызыт вийыште улшо налог системым уэмдыме кышкарыште ямдылен. Вашталтыш-шамыч элыштына налогообложенийын прогрессивный манме шкалажым пуртымо дене кылдалтыныт. Тудыжо налог системым утларак чыным да балансироватлымым ыштымашке виктаралтын.
Федеральный закон-влакын темлыме проектыштым Кугыжаныш Думо шошымсо сессийыштыже ончаш палемден. Депутат-влак нуным сайлан шотлат гын, налогообложений системысе вашталтыш-шамыч 2025 ий 1 январь гыч вийыш пурат.
М.ИВАНОВА
Марий Эл Кугыжаныш Погынын фотожо
