«Инфраструктура для жизни» у нацпроект дене келшышын, Марий Элыште коммунал сферыште улшо 27 объектым уэмдаш палемдыме.
Марий Эл вуйлатыше Юрий Зайцев Россий Федерацийыште региональный вияҥмаш шотышто правительственный комиссийын президиумжын заседанийышкыже видеоконференц йӧн дене ушнен. Заседанийым вице-премьер Марат Хуснуллин вӱден.
Россий правительствыште 2030 ий да ончыкыжым 2036 ий марте илышыш шыҥдарышаш нацпроект-влакым ямдылыме, ойыраш кӱлмӧ финанс кугытым шотлымо паша мучашке лишемеш, палемден Марат Хуснуллин.
Россий президент Владимир Путин «Инфраструктура для жизни» у нацпроектым темлен. Тудо илем-влакым чыла шотыштат вияҥдымашке виктаралтын: тиде – корным чоҥымаш да олмыктымаш, калыкым шупшыктышо транспортым налмаш, мер кумдыкым да кудывечылам тӱзатымаш.
Марий Эл правительстве Россий Минстройыш республикысе коммунал инфраструктурын 27 объектшым уэмден ыштыме шумлык йодмашым колтен, тышеч 19-ыже йӱшаш вӱдым ситарыме дене кылдалтын.
Моло ийласе семынак, граждан-влакым аварий лӱдыкшӧ лийын кертме илыме вер гыч вес вере кусарымашлан кугу тӱткыш ойыралтеш. Марий Элыште 472 шуко пачеран пӧрт гыч (115,3 тӱжем квадрат метр кумдык) 7868 еҥ куандарыше вашталтышым вуча.
Шушаш ий гыч нацпроект кышкарыште «Оласе средам йӧнаным ыштымаш» федеральный проект почеш субсидий пуалтеш. Марий Элын Чоҥымо да ЖКХ министерствышкыже 44 муниципальный образований гыч йодмаш пурен, кызыт проект-влакым ойырат. План почеш 10 кудывечым да калык тӱшкан коштмо 41 верым тӱзаташ палемдыме.
Тылеч посна йӧнан оласе средам ыштыме эн сай проект-влакын IX Всероссийский конкурсыштышт сеҥыше кум проект 2026 ий марте шукталтеш.
Марий Эл Республикым вуйлатышын пресс-службыжын уверже негызеш
Л.СЕМЕНОВА ямдылен
Денис Речкинын фотожо
