Марий Эл тазалык аралтыш министрын алмаштышыже Татьяна Бастракован (снимкыште) мутшо почеш, республикысе медорганизацийлаште плановый медицине полышым угычын пуаш тÿҥалме.
– У коронавирус инфекций дене палынак шуко еҥын черланымыжлан кöра тений январь мучаште регионыштына плановый медицине полышым пуымым чарныме ыле. Медик-влак лым лийде манме гай пашам ыштеныт гынат, онкочерле-шамычлан плановый хирургический, химиотерапевтический да радиологический полышым тичмашын пуэныт. Тыгак мÿшкыран ÿдырамаш-влак, поснак соматический але акушерско-гинекологический патологиян да нелылыкан-шамыч, плановый полышым кÿрылтыш деч посна налыныт.
Йоча республиканский клинический больницыштат плановый медицине полышым пуымым чарныме огыл. Амбулаторий ден поликлиникылаште паша ешаралтмек, 24 январь деч вара аҥысыр специализациян врач-шамыч медорганизаций-влакын фильтрыштышт инфицироватлалтше пациент-влакым приниматлаш тÿҥалыныт. Тидлан кöра йоча-влаклан плановый медицине полышым ик жап пуэн огытыл. Кызыт чыла медорганизаций ончычсо паша радамышкыже пöртылын.
Республикысе медицине организаций ден федеральный рÿдерлаштат кÿкшö технологиян медицине полышым пуымым чарныме огыл.
Медик-влак вакцинаций рÿдерлаште да поликлиникылаште у коронавирус инфекций деч прививкым кажне кечын ыштеныт.
Таче кечылан калыклан профосмотр ден диспансеризацийым угыч эртараш, тыгак у коронавирус инфекцийым чытен лекше-шамычын тазалыкыштым келгынрак шымлаш тÿҥалме.
Куснылшо медицине комплекс-влакланат яллашке лекташ йöн ышталтын.
У коронавирус инфекций дене кылдалтше сÿрет саемын толеш. 24-25 январьыште медик-влак суткаште 20 тÿжем наре еҥым приниматленыт, тылеч посна эше черле-шамыч деке мöҥгышкышт лектын коштыныт гын, ик арня гыч тиде чот 4 тÿжем нарылан иземын.
Тидымат палемден кодыде огеш лий: у коронавирус инфекцийым чытен лекше южо пациент вий ситыдымылан, вуйуш лушкымылан, тÿткыш шаланымылан, омо шумылан але йоммылан, аздаралтмылан вуйым шиеш. Чыла тиде – черын косаже.
Черланыме годым вуй корштен, вÿргорно давлений ден шÿмпералтыш «модыныт» гын, нине ситыдымаш эше кужу жап орландарен кертыт. Коронавирус годым шÿм минутышто 80-100 гана туртын кертеш, тидлан кöра шÿлыш петырна.
Тыгак йыжыҥ корштен, пагар-шолора корнын пашаже пужлен, логар тургыжландарен, лимфатический пышкем кужу жаплан шарлен кертыт.
Кид-йолышто вÿргорно коршта, вÿр коштмо паша пужла да кид-йол шокшо верыштат кылма гын, вÿрын малыме системыжым тергаш кÿлеш.
У коронавирус инфекций дене нелын черланымылан кöра стационарыште кортикостероидный терапийым эртыме годым вÿрыштö сакыр шукемын кертеш. Препаратым иземдыме але кораҥдыме деч вара 80 процент ужаш пациентын сакырже нормыш пöртылеш, но 20 процент ужашыжын сакыр диабет вийым налын кертеш.
Тидымат шотыш налман: коронавирус иммунный системым чот луштара, сандене аутоиммунный чер-влак вияҥыт сеҥат – тидыже поснак кок-кум гана черланыше-шамычлан лÿдыкшö. Вирусан вес инфекцият, мутлан, герпес, пÿсемын кертеш. Сандене кажне еҥлан шке тазалыкшым тÿткын эскераш да уто-ситым шижме годым вигак участковый врач деке каяш кÿлеш.
М.ИВАНОВА
