Норильск гыч марий пӧръеҥ Станислав Ельцов телевиденийын НТВ каналже дене кайыше «Своя игра» передачыште сеҥышыш лектын. Аваже тудын– марий, а ачаже – одо, но шкенжым марийлан шотла. Тидым материал пелен савыкыташ колтымо фотографийже гочат ужын кертыда.
Передачыже 3 апрельыште ончыкталтын. Станислав 43 ияш, Йошкар-Олаште шочын-кушкын, кызыт Норильскыште ила, Талнахский обогатительный фабрикыште нылымше разрядан электромонтёрлан пашам ышта. Шке бригадыж дене пырля гидротехнический сооруженийын кум кугу цехшым да гидротранстпортым обслуживатла. Передаче деч ончыч шкеж дене изиш палдарен. Тудо исторический литературым лудаш йӧрата, тыгак –стратегический компьютер модыш-влакым. Кум ияш Саша эргыжланат саламым каласыш.
Станиславын кок соперникшат виян лийыныт. Туге гынат марий рвезе финал марте шуын. А пытартыш йодышлан Йӱдвелне илымыжат чын вашмутым пуаш полшен, векат. Тыге тудо сеҥышыш лектын.
Сеҥымашыш шуаш тудлан совет жапыште налме образований да реакцийым писемдыше компютер модыш дене модаш йӧратымашыже полшен манеш. Тымарте моло тудо интеллектуальный модмаште участвоватлен огыл. А ты передачым шукертсек ончен. Шке семынже эре гаяк йодыш-шамычлан вашештен. Варажым шекланаш тӱҥалын: участник-влак огыт вашеште, а тудын вашмутшо эре гаяк чын лийын. Сандене шкенжым терген ончаш кумылжо лектын, да йоҥылыш лийын огыл.
Передаче жапыште Станиславын шинчымашыже чынжымак кӱкшӧ да тӱрлӧ шӧрынан улмым ужына. Ойлымыж почеш, тудо историк лияш шонен, но пӱрымаш вес семын савыралын. Туге гынат шке шочмо калыкшын эртыме корныж нерген шинчымашыжым пойдаренак толеш. А молан тудым шымлаш тӱҥалын? Черемис-влакын шке эрыкышт верч кужу пагыт кредалмышт нерген Кармазинын возымыжым лудын лектын. Кызыт ынде тидын шотыштак марий историк-влак дене кылым куча. «Нунын дене палыме улмо денат моткоч кугешнем», – палемда шкеже.
Тудын аважат – Алевтина Алексеевна Круковская – передачым ончен. Тудо – сӱретче да поэт. Норильскыште марий диаспорымат вуйлатен. Кеч марийже олаште шукынжак уке улыт.
«Своя игра» модышышто модын налме оксаже кугу огыл. Но пӧръеҥлан тидетӱҥ огыл, кумылжо нӧлталалтмыжак мом шога! «Сеҥымемлан моткоч куаненам. Пырля пашам ыштыше йолташем-шамычат ӧрыктареныт, эсогыл Москваш каяш оксамат погынешт ыле», – каласыш шкеже. Вес передачым, ( туштат Станислав шке вийжым терген) май кыдалне ончыктат. Меат Норильскыште илыше землякнам шокшын саламлена.
Светлана Носова
Снимкыште: С.Ельцов.
Фотом С.Ельцовын еш альбомжо гыч налме.
