Уло ешге ӱстел йыр шинчын кочмым шкешотан йӱла семынат шотлыман. Вет лач тыгай годым икте-весе дене чоным почын мутланаш, ыштышаш паша нерген каҥашаш йӧн лектеш. Южо ешыште шонымо семын, мучан-мучан ӱстелтӧрыш шинчыт але, посна лийын, вес пӧлемыште кочкыт. Тыгай сӱрет, мутат уке, кумылым волта.
Йолташ-влак, а те ешда дене иквереш шинчын кочкыда? Тиде йӱлам шукертсекак шуктеда? Кочмо годым шотыш налме ой-каҥашым ала темледа?
Алина ЕГОШИНА, Марий Элын сулло артистше:
– Эрге-влак кушмо семын ӱстелтӧрыш шуэнрак пырля шинчын кочкына. Паша да тунемме жап кажнынан тӱрлӧ, а кас кочкышым гын пырляк ышташ тыршена. Лач сай йӧн кутыраш, кӧн кузе кечыже эртен, эрласе кечым да вес канышнам пырля эртараш кунам келшен толеш, каҥашена. А уло ешге погынымо – мыланна пайрем. Йӧратыме кочкышыштым ямдылаш тыршем. Ӱстелымат моторын погаш келша. Шукерте огыл марий тӱран ӱстембалшовычым, салфетке-влакым, солыкым тӱрлыктенам, пеш сӧралын койыт.
Пырля шинчын кочмаш кажне ешын поро йӱлаже лийшаш.
Кристина БЫКОВА, «МЭТР» телекомпанийын корреспондентше:
– Ешыштына кас кочкышым чылан пырля ышташ тыршена. Тунамак тӱрлӧ йодышым каҥашена. Эрдене да кечывалым пашалан кӧра тыгай йӧн уке.
Изинекак уло ешге ӱстел йыр шинчын кочкаш тунемынна. Тыгай йӱла ешым икояным ышташ полша, икте-весым умылаш да колышташ туныкта.
Александр МАРКОВ, гармоньчо (Оршанке район):
– Кӧн кунам кочмыжо шуэш, тунам кочкеш. Тӱшкан иктаж сомылым рӱж ыштен шуктымеке, чыланат ӱстел йыр пырля шинчына. Тыгай годым умбакыже пашам вораҥдарен колтымо нерген веле огыл, южгунамже тӱрлӧ нергенат мутланена.
Ольга Гаврилова, Кугу Порат кыдалаш школ вуйлатыше (Волжский район):
– Ешыште кажнын шочмо кечыжлан але иктаж пайремлан уло ешге ӱстел йыр погынена. Чылан иквереш лиймеке, кумыл нӧлталтеш, суртыштат волгыдынрак чучеш. А тыглай кечылаште пелашем да авам дене кас кочкышым пырля ыштена. Пайрем ӱстел йыр чумыргымо годым лӱмынак чапле кӱмыж-совлам луктына. Авам изиэм годсекак тыге ыштен, садлан кызытат тудын семынак ышташ тыршем.
Уло еш дене иквереш лийме годым оҥай случайым, поснак икшыве-влакын йоча пагытыштым, пиалан тат-влакым шарналтена, тӱрлӧ мыскарам колтена, ыштышаш сомыл нерген каҥашена.
Кӱлешан кугу пашам тӱҥалме деч ончыч уло ешге чумыргена да тудым ыштен колтымо нерген каҥашена, тиде але вес нелылык гыч лекташ тӱрлӧ йӧным пырля кычалына.
Аделина Батаева, самырык мурызо:
– Изи годсекак уло ешге ӱстелтӧр йыр шинчын кочкынна, да ыштышаш паша нерген мутланыме. Тиде шкешотан йӱлашке савырнен да кызытат аралалт кодын. Кажныланна пырля лийме шерге. Тыге кугурак-влак изиракыштлан примерым ончыктена, шонем.
Алевтина БАЙКОВА ямдылен
Авторын фотожо
