14 июньышто Звенигово район Какшамарийыште композитор-влак Яков Эшпайын шочмыжлан 135 ий, Андрей Эшпайын шочмыжлан 100 ий темме лӱмеш «Вӱдшӧ йога…» фестиваль эртен.
Уло тӱнялан чапланыше ача ден эрге Эшпаймытын кумда сымыктыш тӱням профессионал музык дене пойдарыме надырышт моткоч кугу. Тидымак шотыш налын, верысе Йоча сымыктыш школ тений кумшо гана муро фестивальыш калыкым чумырен.
Программым Провой кундемын ятыр коллективше, тыгак Морко район гыч В.Лазарев лӱмеш академический хор, Я.Эшпай лӱмеш Марий кугыжаныш филармоний пеленысе калык мурым мурышо «Эрэҥер», кӱслем шоктышо «Чинчывий», Чебоксар ола гыч «Ялкын» («Пламя») да Чуваш Республикысе Мариинский Посад гыч «Шанчак» («Надежда») ансамбль-влак сӧрастареныт.
– Программын икымше ужашыштыже ӱжмӧ уна-влак, а кокымшыштыжо шкенан кундемысе коллектив-шамыч мастарлыкыштым ончыктеныт. Йырваш Эшпаймытын семышт йоҥген, поснак Андрей Эшпайын «Москвичи», «Жажда» кинофильм гыч «Машан мурыжо», «Вӱдшӧ йога» мурыжо-влак кумылым нӧлтеныт, – палемдыш Какшамарий йоча сымыктыш школ вуйлатыше Надежда Акреева. – Калык лӱмым нумалше «Шанчак» ансамбль чуваш композитор Анатолий Тогаевын мурыжо-влакым йоҥгалтарен.
– Анатолий Тогаев Марпосадыште илен. Андрей Эшпай – тудын тукым уныкаже. Жапше годым Яков Эшпай Какшамарий школышто музыкым туныктен, а Анатолий Тогаев тысе икымше номеран школышто тиде предметымак туныктен. Яков Андреевич чуваш йолташыжын изажын ӱдыржым марлан налын. Андрей Эшпайын кочажым Мариинский Посад шӱгарлаш тойымо. Эшпаймыт Москошто иленыт, Кугу Отечественный сар тӱҥалмеке, нуно Какшамарийыш илаш кусненыт. Андрей Эшпайым Тогаевмыт деке илаш колтеныт. Тудо мемнан оласе школым тунемын лектын. Сарышкат Марпосад гычак каен. Варажымат Андрей Эшпай олашкына чӱчкыдынак толын коштын: ятыр йолташыже лийын, – каласкалыш «Шанчак» ансамбльын участницыже Роза Ракова. – Пайремлан организатор-влак моткочак сайын ямдылалтыныт. Калык муро кумылан да келшымаш шӱлышан вашлиймаш кужу-у жаплан шарнаш кодеш. Кугыеҥ-влак дене мутланыме годым йоча, самырык жапым, икте-весе деке унала коштмым порын шарналтенна. Какшамарийыште илыше-влак Марпосадыш телым издер, а кеҥежым Юл эҥер дене пуш дене выньыкым, турнявӧчыжым ужалаш коштыныт. Мыят изиэм годым Марпосад гыч Юлъял пазарыш емыж-саскалан, телым коваште упшым, кемым налаш коштынам. Тунам ГЭС лийын огыл, садлан эҥер вӱд чот кылмен, ий ӱмбалне автомашина денат кудалыштыныт. ГЭС-ым чоҥымеке, Какшамарий кундемыш йолын коштмым чарненна, вашкыл начарештын. Пачер окнам гыч Юлъялын тул волгыдыжым ужам да чонем куана.
Роза Николаевна дене мутланымеке, весат кумылым нӧлтыш: Мариинский посадыште 2025 ий Андрей Эшпайын идалыкше семын эрта, садлан тушто уста композиторлан пӧлеклалтше ятыр мероприятий лийшаш. Теве, мутлан, тиде шуматкечын, 21 июньышто «Акатуй» пайрем калыкым чумырышаш.
Алевтина БАЙКОВА
Фотом Юлъял тӱвыра пӧртын
альбомжо гыч налме
