Кӱшыл школышто туныктышо профессийын статусшым нӧлталаш 2017 ийыште Россий мучко «Кӱшыл Школын Шӧртньӧ Лӱмжӧ-влак» проект илышыш пурталтеш. Тений тудын «Шанче да туныктымо пашаште самырык талант-влак» номинацийыштыже Марий кугыжаныш университетын пашаеҥже, проект офисын координаторжо Татьяна Лановая сеҥышыш лектын.
Кажне ийын конкурсыш уло элна гыч вузлаште тыршыше 1000 утла преподаватель ушна. Теният тыгак лийын: Российын 75 регионжо гыч 1098 туныктышо усталыкшым ончыктен. Проектым илышыш пуртышо-влакын ойлымышт почеш, ӱмашсе дене таҥастарымаште, йодмашын качествыже тений палынак саемын, сандене сеҥыше-влакын радамышкышт – 150 еҥ коклаш – логалаш куштылго лийын огыл. А мемнан Татьяна Лановая ик эн тӱҥ номинацийыште сеҥен.
Г.Кожевникова
