Кодшо кугарнян Йошкар-Оласе кӱртньыгорно пашаеҥ-влакын скверыштышт, а рашракше, Советский уремын 176-шо да Яналов уремын 4-ше номеран илыме пӧртла воктене, ваштарым шынденыт.
Пушеҥгым шындымашке Йошкар-Ола погынымашын депутатше-влак лектыныт, нунын деке рӱдолаште илыше-шамычат ушненыт. Тиде саклымверым, «Оласе средам йӧнаным ыштымаш» федеральный проект дене келшышын, тений июньышто тӱзатен пытарыме, палемден «Йошкар-Ола» ола округын вуйлатышыжлан шукерте огыл сайлалтше Лев Покровский. Тудын мутшо почеш, тыште 3,5 тӱжем квадрат метр кумдык тротуарыш асфальтым шарыме да брусчаткым оптымо, 46 теҥгылым, 30 утла урным вераҥдыме, йырым-йыр волгалтарыме. А «Паровоз» арт-объект тора гычак поснак сымыстарышын коеш.
Шындыме пушеҥге-влак кошар лышташышт дене ойыртемалтыт, эн мотор ваштарлан шотлалтыт, писын иланат, санденак ландшафт дизайныште кумдан кучылталтыт.
Лидия СЕМЕНОВА
Фотом Йошкар-Ола администрацийын соцкыл лаштыкше гыч налме
