УВЕР ЙОГЫН

Ик эн тӱҥ ӱшан – нунылан

Марий Элыште Россий прокуратурлан 300 ий теммым палемденыт.

Тиде дате дене республикысе прокуратур органлаште пашам ыштыше-влакым регион вуйлатыше Александр Евстифеев саламлен.

Торжественный мероприятий 14 январьыште Эрик Сапаев лӱмеш Марий кугыжаныш академический опер да балет театрыште лийын. Тӱҥалтыште  погынышо-влаклан «От имени Государства во имя Общества. 300 лет Прокуратуре России» фильмым ончыктеныт.

Саламлымыж годым Марий Эл вуйлатыше палемден: 1722 ий годсек прокуратур законностьын да порядкын ик эн тӱҥ гарантше лийын кодеш. Тудо тыгак национальный проект-влакым, республикын социально-экономический вияҥмаш индивидуальный программыжым илышыш шыҥдарымаште кугу рольжым палемден. Регион вуйлатышын ойлымыж почеш, нунын дене кылдалтше пашам ыштыме – кугыжаныш контрактым шуктымо – годым лачшымак прокуратур пашаеҥ-влак подрядчик-шамычын ситыдымашышт ден экшыкыштым, титакыштым тӱжваке луктыт. Тыгак прокуратурын полшымыж денак 2021 ийыште 2400 утла еҥлан налдыме пашадарыштым пуэныт. Тыге чылаже 43,5 миллион теҥгем оксам нунылан тӱлыктыктеныт.

– Республикын прокуратуржо кызыт могай паша лектышым ончыкта – тиде кугу тыршымашын лектышыже. Правам аралыше ден исполнительный кучем орган-влакын мутланен келшен пашам ыштымыштат сай лектышыш шуаш полша, – палемден Александр Евстифеев.

Тыгак тудо республикысе прокуратурын ветеранже-влаклан поснак тауштен ойлен:

– Тендан пашада, эллан ӱшанлын служитлымыда кызытсе тукым пашаеҥ-влаклан сай пример лийын кодеш.

Пытартышлан регион вуйлатыше ведомствын пашаеҥже-влаклан пашам кӱлеш семын шуктымыштлан тауштен да тазалыкым, пиалым, сеҥымашым тыланен.

Официальный ужаш жапыштак ойыртемалтше-влаклан тӱрлӧ кӱкшытан наградым кучыктеныт. Республикысе прокуратур вуйлатыше Сергей Беляков тидлан регион вуйлатышылан тауштен да тылеч вара РФ-н генеральный прокуроржо Игорь Красновын колтымо саламлымашыжым лудын. Тыгак тудо палемден: Марий Элын прокуратурыжын шуктымо пашаже Российын историйже дене кӱрлаш лийдымын кылдалтын.  

Опубликовать в Одноклассники

Добавить комментарий