Марий Турек районысо Тат-Китне ялыште «Здравоохранений» национальный проектын «Марий Эл Республик тазалык аралтышын первичный звеножым модернизироватлымаш» регионысо проектшым илышыш пуртымо кышкарыште чоҥымо у фельдшер-акушер пункт ынде пел ий пашам ышта.
Тат-Китне, Якын почиҥга, Марий Шолкер, Тат-Шолкер, Елка, Катыршан почиҥга яллаште илыше калык 82 квадрат метр кумдыкым айлыше ФАП-ым сай велым аклен, вет 1965 ийыштак чоҥымо да аварий лийын кертме лӱдыкшанлан шотлалтше тошто медпункт дене таҥастарымаште тудо – просто чапле полат!
Верысе калык у ФАП-ын «озаватыж» нергенат поро мутым гына ойла. Медсестра Людмила Георгиевна Кожевникова – 30 ий паша стажан специалист. 1983 ийыште Вӱрзым медицине училищым тунемын пытарымыж деч вара Марий Турек посёлкыш толын да районысо рӱдӧ больницыште 10 ий медсестра-анестезистлан ыштен, а реанимаций отделенийым почмеке, тушко куснен.
Вара паша биографийже кум гана кӱрылтын – «ковалан» ыштен, Анна ӱдыржылан поче-поче шочшо кум эргыжым ончаш полшен. А Макар, Иван да Илья уныкаже-влакын изишак кушмекышт, угыч пашашке пӧртылын. Верысе рӱдӧ больницын ковидный отделенийыштыже кок ий наре пашам ыштымыж годым кугу опытым поген, медициныште профессионал улмыжым ончыктен.
– Тидым, очыни, шке профессийым йӧратыше еҥ-влак гына шижыт, – манеш Людмила Георгиевна. – Ача-аванан кандаш йоча лийынна, мый шымше улам. Ачам ден авам, манмыла, пашаште иленыт, сандене ешыштына икшыве-шамыч нигузеат йолагай кушкын кертын огынал. Больнице гыч икымше уныкам ончаш кайымем годым тылзе утла шот дене маленжат кертын омыл – йӧратыме пашам деч посна кузе илаш тӱҥалам манын, чарныде тургыжланенам. А вара илышыштем эн кугу шонымашем шуктенам – Ӱлыл Турекыште, Тат-Китне деч тора огыл, пӧртым чоҥенам, да Марий Турек больницын тӱҥ врачше Флюра Гайнановна мыйым у ФАП-ыш пашам ышташ ӱжӧ. Пеш ӱшандарен ойлыш, пеш кумылаҥдыш! Мыйын опытан санитаркем Раиля Фахуртдинова ФАП-ыште пашам ыштымыж жапыште калыкым утларак пален налын, сандене кызыт мыланем шуко мо дене полша. Обслуживатлыме куд ялыште чылаже 757 еҥ ила, ты чот гыч 153 пациентше – йоча. Коштын кертдыме, кийыше черле-влакат улыт, но нуно шкет але кудалтен кодымо огытыл, молан манаш гын тыште еш йӱла чот пеҥгыде.
Ик пачашан модульный у зданийыште пациент-влакым приниматлыме, процедурный да смотровой кабинет-влак, эмым аралыме помещений, моло пӧлем улыт. Калык тышке кумылын коштеш. Телым ФАП-ыш кечыште 18 еҥ марте толеш, кызыт, шошо тургым пагытыште, изиш шагалрак – кечыште 10 пациент йотке.
Медикым шуэн огыл мӧҥгышкат ӱжыктат. Эн тора ял ФАП деч индеш километр коклаште верланен. Тыштыже Людмила Георгиевналан водительлан тунем лекмыже моткоч полша, ӱдырамаш ынде 12 ий автомобильым виктара.
Икманаш, «Здравоохранений» национальный проектын полшымыж дене медсестра Л.Кожевникованат, кундемысе калыкынат пӱрымашышт сай илыш йогыныш пурен.
М.ИВАНОВА
Снимкыште: Тат-Китне фельдшер-акушер пункт
Марий Эл Тазалык аралтыш министерствын фотожо
