Марий Элым вуйлатыше Юрий Зайцев Йошкар-Оласе медицине колледжын кумдыкыштыжо профессиональный порысым чыла жапыштат лачымын шуктышо, марий кундемысе калыкын тазалыкшым аралымаште лым лийде тыршыше медицине пашаеҥ-влаклан пӧлеклалтше барельеф шотан монументым почын.
Регионыштына тиде тыгай суапле профессийлан шкем пӧлеклыше еҥ-влаклан – икымше монумент.
– Медик-шамыч чыла жапыштат эреак ончылно лийыныт. У историйыштат тыгакак. Пандемий годымсо нелылыкым те эн сайын паледа. Тудын ваштареш чыланат пырля кучедалынна, молан манаш гын «ковид» мут «колымаш» дене иктӧр гаяк лийын. Врач-влак калыклан шкешт колен кертме деч лӱдде полшеныт. Тиде монумент – тендан пашаланда ак, калыкнан тазалыкше верч ыштыме поро пашаланда ак, – палемден Ю.Зайцев.
Регионым вуйлатыше медицине пашаеҥ-шамычлан кӱкшӧ профессионализмым ончыктымыштлан тауштен, тазалыкым, сеҥымашым, вийым да чытышым тыланен.
Монументым Республикысе кокла медицине пашаеҥ-влакын ассоциацийыштын вуйлатышыже, Россий Федераций да Марий Эл Республик здравоохраненийын сулло пашаеҥже, Тазалык аралтыш министерствын сестринский пашам виктарыме шотышто тӱҥ специалистше Евгения Яковлевна Кузьминыхын тӱҥалтышыж почеш Россий Федерацийын да Марий Эл Республикын сулло сӱретчыже-влак Анатолий Васильевич ден Галина Петровна Медведевмыт ыштеныт.
Постаментыште – кум бронзо фигур: врачын, сар жапысе медсестран да кызытсе жапысе медицине пашаеҥын. Нуно кажнынан гаяк илышыштына поро пашашт дене шарналт кодыныт. Нине еҥ-влак ончылно вуйым тауштен савыме шуэш.
Скульптур композиций, медик-ветеран-шамычым чапландарен, пеледышым пыштыме, кушкын толшо тукым ден студент-влаклан патриот шӱлышан мероприятий-шамычым эртарыме вер лиеш.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
